Hdyž je wjedro dźeń a bóle nazymske, so triatlonowa sezona nachila. Wosebje do wody nikoho wjac njećehnje. Zo pak njeby přestawka hač do nalěća předołha była, maja sportowcy přeco hišće dwě disciplinje, w kotrymajž móža so wubědźować. Tuž přeprosy Budyske sportowe towarstwo BLV Čerwjeno-běli 09 štwórty raz na swój crossowy duatlon, kotryž je lětsa zdobom jako sakske mišterstwa přewjedło. Porno normalnemu dwu- abo třibojej njeběha a njekolesuje so na asfalće, ale na přezpólnym a lěsnym terenje, za čož so Humboldtowy haj wuběrnje hodźi. Znata mountainbikowa čara po­dłu Sprjewje bě trochu wolóžena, zo by kóždy z triatletow, kiž skerje zrědka na mountainbikach sedźa, čaru zmištrować móhł. Ale stajne horje a dele z wuskimi křiwicami skići dosć wužadanja na mocy a wutrajnosć sportowcow. K tomu přińdźe hišće dešć, kiž je čaru zdźěla na błóto přeměnił.