SJ Chrósćicy II

– Wulka Dubrawa 0:3 (0:1)

Zestawa domjacych: Matješk – Donat (46. Lešawa), Mark, D. Bogusz (23. Zahrodnik), Wowčer, Liznar, Šiman, J. Bogusz (58. Budar), Jakubaš, Dórnik, Šmit

Zašłu njedźelu hrajachu hnydom třo z młodźiny A za SJ Chrósćicy II. Přede­wzaće, hru dobyć abo sej znajmjeńša prěni dypk wubědźić, bě hižo po třoch mjeńšinach zabyte. Nico Heinrich startowaše w swójskej połojcy, wuhra Měrćina Jakubaša a Klemensa Marka a hižo steješe 0:1. Wulka Dubrawa běše lěpše mustwo, ale poslednja konsekwenca pobrachowaše. Tak so jej najprjedy jónu 0:2 njeporadźi. Domjacy běchu jeno přez kontery strašni abo přez Jana Bogusza. Srjedź prěnjeho połčasa so wón přećiwo třom přećiwnikam přesadźi, wrotarja pak njezamó přewinyć.

Druhi połčas njebě wjele lěpši. Nickej Lešawje a Lucianej Zahrodnikej, kotrajž běštaj hižo 90 minutow za młodźinu A hrałoj, pomału mocy popušćichu. Rezerwa SJC skutkowaše bjezmócna a přećiwnik zwyši na 0:2 (52.) a 0:3 (70.). Zmylki kaž tež pobrachowacej koncentracija a personal su kermušnu partiju rosudźili.