Chorownje maja přez cyłe lěto dosć konserwow k dispoziciji
Budyšin (SN/mwe). „W běhu lěta prawidłownje registrujemy, zo je jich jónu mjenje a jónu wjace krejnych konserwow. Wosebje w ćopłych lětnich měsacach a prózdninskim času, ale tež swjate dny kaž hody, swjatki a jutry mjenje ludźi krej dari“, to zdźěli na naprašowanje našeho wječornika Marion Junghans, zastupowaca nawodnica krejdarowanskeje słužby Haema w Lipsku. Runja Němskemu čerwjenemu křižej (DRK) zamołwja Haema krejdarjenske akcije a organizuje tajke mjez druhim w Budyšinje a Wojerecach. Zdobom chorownjam krejne konserwy dodawa. Informacijam, zo mějachu kliniki minjene tydźenje nuzu z krejnymi konserwami, Junghans přihłosować njemóže.