Bě to podobnje mrowišću. Wšudźe so hibaše a wěste wospjetowace so dźěławosće a wotběhi běchu spóznać. Tež, hdyž zdaše so to wulka mjerwjeńca, wotběža wšitko w rjadowanych strukturach. To ma system. Tajki bě zaćišć, kajkiž měješe tón, kiž wotpohladnje abo jeno připadnje njedawno na Ralbičanskim hrajkanišću pěstowarnje pozasta. Pilnje dźěłachu tam młodźi ludźo, starši pěstowarskich dźěći. Jim poboku běchu gmejnscy dźěłaćerjo z wotpowědnej techniku. Mjez dźěłacymi wuhladach tež kubłarki a zastupjerjow nošerja kubłanišća, Serbskeho šulskeho towarstwa (SŠT).
Loni nazymu hižo běchu starši a staršiska rada dnjoweho přebywanišća „Dr. Jurij Młynk“ gmejnu prosyli so sobu wo to starać, zo so hrajkanišćo bjezposrědnje při pěstowarni powjetši a ponowi. Te wšak wužiwaja nimo chowancow kubłanišća tež dźěći jako zjawne hrajkanišćo.
