Kak chcedźa regionalny plan za Hornju Łužicu a Delnju Šlesku dale wjesć, to su wčera w Budyšinje rozjimali. Jedyn cyły kapitl plana wěnuje so jeničce serbskim naležnosćam.

Budyšin (AK/SN). Ze swójskim kapitlom pod dypkom 7 „serbski sydlenski rum“ wěnuje so regionalny plan Hornja Łu­žica-Delnja Šleska zaměram a zajimam Serbow. „Najwažniše dypki su zapřijate. Wone pak dawaja komunam swobodu a swobodu za spěchowanske móžnosće“, podšmórny referent Domowiny za hospodarske a infrastrukturne naležnosće Pětr Brězan po wčerawšej zhromadźiznje regionalneho zwjazka w Budyšinje. Tam su naćisk druheho dalepisanja plana předstajili a rozjimali.