Z doskónčnym podpisanjom zakładneho zrěčenja so LEAG wróćo dźerži

Trjebin (AK/SN). Ze žanym słowom njejsu rěčnicy na Borborinym swjedźenju koncerna Łužiska energija a milinarnje (LEAG) zakładne zrěčenje za najbóle wot Wochožanskeje jamy potrjechenu wjes Miłoraz mjenowali. „To mje zamyla. Bych jasne słowa wočakował. Připowědźili su podpisanje za december, po tym za januar. Nětko na swjatočnosći njeje ani słowčko k tomu padnyło“, pod­šmórny wjesnjanosta Waldemar Locke (CDU) srjedu na posedźenju Trjebinskeje gmejn­ske­je rady. Z Miłoraskimi wjesnymi radźi­ćelemi bě so wón na Borborinym swjedźenju wobdźělił. Hakle na naprašowanje pola LEAG dósta po zmysle slědowacu wotmołwu: „Dohladowanska rada je přesydlenskemu zrěčenju přihłosowała. Předsydstwo LEAG je społnomóc­njene zrěčenje podpisać. Z wuměnjenjom pak je, zo poručenja strukturneje komisije Zwjazka bytostnje do rewěroweho koncepta LEAG njezasahuja.“