Budyski Serbski muzej chce z wosebitej wustajeńcu na dźeń wotewrjeneho muzeja wabić. Za to su muzejownicy hłuboko w archiwach ryli a dotal njewidźane wosebitostki wupytali.
Budyšin (SN/MiR). Zapřijaty do Mjezynarodneho dnja muzejow budźe z poskitkom na jedyn dźeń tež Budyski Serbski muzej. Zastup do zarjadnišćow za poskitk, wotměwacy so po cyłym swěće, je darmotny. „Smy sej za njedźelu, 19. meje, wupytali twórby Budyskich serbskich gymnaziastow“, praji zamołwita za posrědkowanje kultury a zjawnostne dźěło w muzeju Mónika Ošikowa. „Wjetšinu dźěłow běchmy hižo před dlěšim časom za naš archiw nakupili, dalše su hakle njedawno nastali, a muzej dósta je jako požčonki. Pokazali pak je dotal njejsmy.“