Šulerki-koparki 7. do 9. lětnika Serbskeho gymnazija Budyšin (SGB) postarachu so kónc meje w Freitalu wo sensaciju w sportowych stawiznach kubłanišća. Jako prěnje mustwo dobychu wone krajne finale a pojědu wot 17. do 21. septembra na zwjazkowe finale do Berlina, hdźež chcedźa z dalšimi 15 dobyćerjemi tamnych zwjazkowych krajow wo najlěpše zaměstnjenje wojować.

Jědnaty raz je so jedne holče koparske mustwo SGB za sakske krajne finale skwalifikowało. Slěborna medalja w lěće 2013 bě dotal najwjetši wuspěch na tutej runinje. Před štyrjomi lětami w Lipsku bě z kapitanku Leju Krječmarjec, wrotarku Nelu Pjetašec a hrajerkami Tadeju Šeferec, Helenu Hejduškec a Karolinu Šrajterec hižo pjeć serbskich holcow pódla, kotrež postarachu so lětsa w Freitalu ze Saru Łušćanskec, Milenu Kummerec a Laviniju Bührdel wo grandiozny rezultat. Wone dobychu wšitke partije najlěpšich pjeć mustwow Sakskeje. Dokelž knježachu temperatury wokoło 30 stopnjow, skrótšichu zamołwići hrajny čas na dwójce dźesać mjeńšin.

SGB – Weißeritzski gymnazij Freital 5:0

W Holešowskej Dubrawce wubědźowachu so minjeny kónc tydźenja nimo jěcharkow a jěcharjow tež pohončojo ze swojimi konjacymi zapřahami. Na wobrazu widźimy sportowsku korejtu ze Smjerdźaceje, kotruž ćehnje Bulankec připušćak Wulkan. Pohonč je René Bulank, kopilot André Kühne. Smjerdźečanska trójka wobsadźi w Holešowskej Dubrawce druhe městno před Lucasom Wenderothom a Norbertom Kubašom, kotrajž běštaj z walachom Elbfürstom startowałoj. Dobył je wubědźowanje zapřahow Stefan Šołta z Njeswačidła. Foto: Jörg Stephan

Serbski dorostowy kopar Leon Šołta z delnich Sulšec budźe wot noweje sezony w dorosće Dynama Drježdźany za bulom honić, kaž sportowe towarstwo Budissa Budyšin zdźěla. Šuler Serbskeho gymnazija Budyšin póńdźe tuž na Drježdźanski sportowy gymnazij. Nadarjeny dwanaćelětny Sulšečan je pola Sokoła Ralbicy/Hórki z kopańcu započał a dźěše pozdźišo k Budissy. SN

Loni pobychu Worklečanscy wólnočasni koparjo prěni raz na tak mjenowanym „Běrnjacym koparskim turněrje“ w Kamjenicy a wobsadźichu tam hnydom druhe městno. Lětsa so woni tam znowa zapisachu. Zarjadowanje bě zaso wuběrnje organizowane. Hnydom w prěnjej hrě dnja nastupichu serbscy koparjo přećiwo cyłkej organizatora z mjenom „Team běrna“ a 3:0 suwerenje dobychu. Muž zazběhoweje partije běše nowopřichad Ronald Cyž. Wón docpě wšitke troje wrota. Tež přećiwo VfL Kamjenicy Cyž trjechi, Łužičenjo pak duel 1:2 přěhrachu. W dalšimaj partijomaj přećiwo Murmelclub Neukirchenej (2:0) a CFC-fanklubej Sachso (1:0) je Cyž po jednych wrotach třělił. 2:0 w předposlednjej skupinskej hrě poradźichu so Richardej Kmjećej. Tón bě so energisce do přećiwniskeje šěsnatki přesadźił a bul wobhladanjahódnje do syće zhłójčkował.