Hra hižo do połčasa rozsudźena
Budissa Budyšin
– FC Energija Choćebuz 0:4 (0:4)
Zestawa domjacych: Wohlfeld – Kolan, Baudis (64. Iliadis), Patka, Heppner, Hoßmang, Pfanne (83. Kloß), Salewski, Rosendo, Hänsch (13. Müller), Žuljević
Zestawa hosći: Spahić – Matuwila, Weidlich, Viteritti (61. De Freitas Costa), Svab, Kruse (84. Gehrmann), Stein, Schlüter (77. Ziegenbein), Förster, Baude, Putze
Njedźelu nastupichu koparjo Budissy Budyšin doma na Młynkec łuce přećiwo FC Energiji Choćebuz. Byrnjež hosćićel kóždy dypk trjebał, njemóžeše z dobyćom ličić. Přiwšěm pak chcyše Choćebužanam paroli skićić. Hač na Hausdorfa měješe trenar Torsten Gütschow wšitkich hrajerjow k dispoziciji.
Škoda, zo zahaji so partija hnydom z přećiwniskimi wrotami. Patrick Baudis bě hrajerja hosći w šěsnatce foulował, a Fabio Viteritti jědnatku k 0:1 (2.) přetwori. Njetraješe dołho a Joshui Putze třěli 0:2 (9.). To bě tak mjenowany předrozsud. K wšemu njezbožu so Daniel Hänsch zrani, a Josef Müller dyrbješe jeho narunać. Hosćo běchu chětro strašni a swobodne rumy wužiwachu. Lasse Schlüter třěli 0:3 (32.) a tři mjeńšiny pozdźišo Putze samo 0:4.
Sobotu přepodadźa ponowjenu Worklečansku halu
Gmejna Worklecy a sportowe towarstwo Viktoria stej program za přepodaće ponowjenje sportownje a za zarjadowanje 25lětneho wobstaća towarstwa wozjewiłoj. Sobotu, 25. měrca, budu w 15 hodź. w ponowjenej sportowni U 20-wubranka VC Olympije Drježdźany (holcy, 2. zwjazkowa liga) a volleyballisća Viktorije Worklecy přećiwo sebi hrać. Wot 17.25 hodź. předstaji so hudźbny ćah z Kleinröhrsdorfa, w 17.45 hodź. chcedźa nowu sportowu halu oficialnje přepodać. Wot 19.15 hodź. pokročuja z jubilejnym swjedźenjom. Při tym chcedźa Worklečenjo a hosćo na 25 lět Viktorije zhladować.
Njedźelu, 26. měrca, přizamknu so wot 11 hodź. rańše piwko a dźeń wotewrjenych duri. Jurij Bjeńš
Dalša poražka
FC Energija Choćebuz
– VfB Auerbach 1:3 (1:1)
Zestawa domjacych: Spahić – Baude, Matuwila, Stein, Schlüter, Putze, Weidlich, Marcelo Freitas (76. Nattermann), Viteritti, Ziegenbein (83. Mamba), Förster
Z 1:3 je FC Energija Choćebuz dalšu hru přěhrała. Po 0:2 pola rezerwy RB Lipska podleža wona tež VfB Auerbachej, a to w domjacym stadionje. Dokelž su Jenačenjo pola AK Berlina dobyli, móžachu woni předskok w tabulce powjetšić a so chětro daloko wotsalić. Energija bě přećiwo VfB z wulkim ćišćom započała, ale jenož jedne wrota docpěła, a to přez kapitana Marca Steina (9.). Krótko do přestawki pak njefungowaše wothłosowanje z Avdom Spahićom, a Lasse Schlüter trjechi do swójskich wrotow (44.).
Po samowrotach so domjacy w druhim połčasu wjace njezhrabachu. Jich hra bu dale a špatniša. Tak so nichtó njedźiwaše, jako Auerbach w 80. a 89. min. hišće na 1:3 zwyši. Georg Zielonkowski
Kóń na předań
Na turněr Domowiny so přihotowali
Dohromady tři mustwa přichwatachu njedawno do Budyskeje sportownje při Kamjentnym domje, zo bychu so na 35. sokołski volleyballowy turněr wo pokal Domowiny přihotowali. Tón budźe sobotu, 1. apryla. Škit Budyšin bě sej serbske cyłki na mały přihotowanski turněr přeprosył, zo bychu volleyballisća swoju tučasnu formu testowali. Přijěli su nimo Bratrowstwa Róžant tež hrajerjo a přećeljo Sorabije z Lipska.
Sćoplenje přewza sportowc Stefan Cuška. Wosebje Róžeńčenjo kaž tež hrajerjo Škita wužiwachu wječor, zo bychu tón abo tamny nadběh přezwučowali. Po cyłkownje dwanaće hrach mějachu domjacy najwjace dobyćow na konće, slědowaštej Róžant a Sorabija. Wosebity dźak organizatoram za wuspěšny přihot na kóždolětny volleyballowy wjeršk w Serbach. Clemens Šmit
Budissa we łužiskim duelu podležała
Wuslědki (20.03.17)
Wokrjesna koparska klasa, stafla III
Hnašecy-Dobruša II – Porchow II 6:0 (6:0)
Bretnig-Hauswalde II – Huska 1:4 (1:0)
1. ST Huska 11 47 : 6 33
2. Biskopičanske KT II 10 60 : 17 23
3. Mały Wosyk 10 42 : 18 22
4. ST Bart 10 36 : 12 22
5. ST Hnašecy-Dobruša II 11 32 : 17 20
6. ST 1922 Radwor II 10 20 : 30 13
7. ST Hodźij 04 II 10 17 : 32 10
8. Mó.-běli Njeswačidło II 10 12 : 46 7
9. FSV Bret.-Hauswalde II 11 15 : 36 6
10. Drohotka Ramnow II 10 6 : 27 5
11. ST Porchow II 11 6 : 52 1
Sport (17.03.17)
Chcedźa nalěćo witać
Mustwo 1296, sportowcy-volleyballisća abiturneho lětnika 1996 Serbskeho gymnazija Budyšin, zarjaduja štwórtk, 23. měrca, wot 18 hodź. w Ralbičanskej sportowni volleyballowy turněr pod hesłom „Witamy nalěćo“. Něhdyši maturanća su sej pjeć wólnočasnych volleyballowych cyłkow přeprosyli. Su to Serbski gymnazij-wučerjo, Žołto-módri Kulow, Viktoria Worklecy, SJ Chrósćicy a ST Radwor.
Za camp so přizjewić
Tež lětsa budźe w Němskich Pazlicach zaso koparski camp za holcy a hólcow w starobje dźesać do 14 lět. Wot 2015 nawjeduje camp něhdyši hrajer Dynama Drježdźany Frank Richter, rodźeny Kamjenčan. Za spěšnych knihowarjow do 31. měrca wučinja płaćizna 180, po tym 199 eurow na dźěćo. Koparski camp wotměje so wot 24. do 28. julija. Přizjewjenja su móžne pod info@sport-deutschbaselitz.de abo pod tel. čisłom 0163/ 3578785.
Volleyballowy derby
Volleyballistki Viktorije Worklecy hraja jutře, sobotu, wot 14 hodź. w sportowej hali 4. Budyskej zakładneje šule na Hannsa Eislerowej přećiwo rezerwje MSV Budyšina 04. Za wobě mustwje budźe to posledni hrajny dźeń w sezonje 2016/2017.
Kónctydźenska kopańca
Znowa bjez dypka
Hertha BSC II
– Budissa Budyšin 2:1 (2:0)
Zestawa hosći: Wohlfeld – Kolan, Baudis (81. Němec), Pfanne, Heppner, Barnickel (63. Milde), Hausdorf, Rosendo, Salewski, Kloß, Žuljević (76. Müller),
Hladajo na tule wonkownu hru steješe trenar koparjow Budissy Budyšin Torsten Gütschow před ćežkim nadawkom. Z Florianom Hänschom, Martinom Hoßmangom a Pavelom Patku dyrbješe wón hnydom třoch hrajerjow narunać, kotrychž njesmědźeše pjateje žołteje karty dla zasadźić.
Minjenu sezonu bě Budissa w Berlinje 2:1 dobyła. Tónraz pak měješe Hertha lěpši start. Najprjedy třěli Fabian Eisele (34.) 1:0, štyri mjeńšiny pozdźišo Mike Owusu z pomocu jědnatki 2:0. Norman Wohlfeld bě jědnatku dźeržał, Owusu pak w druhim pospyće trjechi.
