We Wulkich Ždźarach jenož dypk žnjeli
SZ Hórnikecy – ST 1922 Radwor 3:3 (2:1)
Zestawa hosći: Wróbl – Henke (71. Zähr), Šěrak Fabian, Šram, Wjeńka, Bejmak, Zimmermann, Nuk, Schulze (90. Karwinski), Buša (60. Omran)
Derje započelia špatnje skónčili
ST Marijina hwězda – SJ Njebjelčicy 1:2 (1:0)
Zestawa domjacych: Schmidt – Wróbl, Łušćanski, T. Jurš, Lipič, Peschmann, Bělk, Hawš, Smoła, Winkler, D. Jurš (67. Rab)
Zestawa hosći: Hahn – Haška, Kubaš, Hanuza, Hoelzel (60. Hrjehor), Cyž, Lejnart, Hommel, Pawlik, Korjeńk (90. Šołta), Janca
Po naposledk wosom dypkach ze štyrjoch hrow chcyše prěnje koparske mustwo ST Marijineje hwězdy w serbskim derbyju přećiwo hišće njeporaženym hosćom z Njebjelčic dale dypkować. Do hry pak rozžohnowachu Christiana Sbjeznieho, kiž ćežkeho zranjenja dla koparsku karjeru zakónči. Nimo toho spominachu klóšterscy hrajerjo a přiwisnicy na Bena Jeschkeho, kiž bě dwaj dnjej do hry zemrěł.
Druhi połčas k remisej wjedł
SJ Chrósćicy – FV Drježdźany 06- Laubegast 1:1 (0:1)
Zestawa domjacych: Králíček – Šiman, Cyž, Sentivan, Šafář, Henčl (80. Dehn), Runt, Domaška, Gries (65. Kunze), Žur, Věchet
Po dobyću minjeny tydźeń přećiwo Biskopičanskej rezerwje chcychu Chróšćanscy koparjo tež faworitej z Drježdźan-Laubegasta hru tak ćežku kaž móžno ćinić. W prěnim połčasu pak mějachu hosćo hrajnu nitku w rukach. W defensiwje stejachu wěsće a domjacym jenož mało dowolichu. Stajnje zaso spěšnje hrajachu přez wonkowne křidła na wrota Petra Králíčeka. Po róžku poradźi so jim zasłužene nawjedowanje. Šmjatańcu před wrotami wuži Robert Scannewin a třěli kulowatu kožu nimo wrotarja do saka (16.). Chróšćenjo běchu so w prěnim połčasu dwójce před wrotami hosći jewili. Radim Věchet pak njezamó so tak prawje přesadźić a Petra Šafářowa třělwa běše přesłaba.
Po přestawce sej dobyće zaručili
Wojerowski FC – Sokoł Ralbicy/Hórki 0:3 (0:0)
Zestawa hosći: Ch. Gloxyn – Rawš (83. Zynda), Matka, B. Bjeńš, von Köding, Schultz, S. Bjeńš, Korjeńk, D. Gloxyn, Domaška (82. Kurjat), Bejma (78. Młynk)
Pola nowačka z Wojerec chcychu koparjo Sokoła Ralbicy/Hórki na kóždy pad dobyć, byrnjež tón tež hižo dźesać dypkow na konće měł. Bjez trenarja Thomasa Schultza, kiž přebywa w Awstriskej na dowolu, dyrbjachu zestawu změnić. Za Bosćija Lulaka a Stanija Šewca zasadźichu Tomaša Rawša a Tomaša Bejmu.
W prěnjej poł hodźinje wotměwaše so hra hłownje mjez šěsnatkomaj, bjez toho zo so něšto naspomnjenjahódneho sta. Hra hosći běše přepomała. Jako Pětr Domaška bul z hłowu Fabianej Korjeńkej wotpołoži, skićeše so Pěskečanej prěnja šansa. Wón pak natřěli wrotarja (30.) Pjeć mjeńšin pozdźišo ćehnješe Bejma z praweje strony dosrjedźa a wotzamkny z mócnej lěwej nohu, ale trjechi bohužel jenož łatu.
Hašenske wubědźowanja přewjedli
Serbscy běharjo přikładnje wojowali
16. běh po Biskopičanskej Butrowej horje
Widźał, słyšał, napisał (04.10.16)
Wot kolegow a přećelow dóstach ke kulowatym narodninam surfowanski kurs darjeny. Srjedź septembra běše skónčnje tak daloko. Podachmy so do italskeho Torbole. Po zapokazanju so prašach, hač to docyła zmištruju. Po tym zo bě nam wučer surfowanje z wětřikom teoretisce wujasnił, stejach krótki čas pozdźišo na wodźe a móžach posrědkowane informacije nałožować. Započatk běše chětro ćežki. Po njeličomnych čarach a padanjach do wody čujach so dale a wěsćiši. Po třoch dnjach smalach po jězoru ze začućom dospołneje swobody. Kóždemu zajimcej móžu jenož poručić, so tež raz w tutej sportowej družinje wuspytać.
Sport (30.09.16)
Wrotarjo trenuja
5. oktobra zarjaduje sportowe towarstwo Benjamin Rudolph z.t. w kooperaciji z Budissu Budyšin treningowy dźeń wrotarjow. Po hesle „Trenować kaž profije“ njech so wrotarjo raz dźeń kaž profije čuja. Cyłkownje změja w Budyšinje tři treningowe jednotki w poskitku. Započatk budźe we 8.30 hodź. na arealu Budissy Budyšin na Neujowej promenadźe 1. Dalše informacije pod www.torwartschule-rudolph.de
Viktoria při wysokim saku
We wobwodnej volleyballowej lize přewjedźe prěnje muske mustwo Viktorije Worklec sobotu hrajny dźeń w Ralbičanskej ćěłozwučowarni. W 14 hodź. nastupi wone přećiwo Běłej Wodźe, wokoło 16 hodź. přećiwo Mittelherwigsdorfej. Wšitcy su wutrobnje přeprošeni.
Wubědźowani woborow
Wohnjowi wobornicy wubědźuja so jutře a njedźelu hišće raz: jutře wot 15 hodź. w Róžeńće a zajutřišim w samsnym času we Worklecach. Tele wurisanje budźe zdobom finalne wo pokal zarjadniskeho zwjazka Při Klóšterskej wodźe.
Kónctydźenska kopańca
01.10. 15:00 Wojerowski FC
– Sokoł Ralbicy/Hórki
02.10. 15:00 SJ Chrósćicy – Laubegast
02.10. 15:00 ST Radwor – FSV Łuty
02.10. 15:00 Mar. hwězda – SJ Njebjelčicy
12. Budyski běhz wutrobu
Šulerjo a wučerjo Serbskeho gymnazija Budyšin (SGB) su hižo wot spočatka pódla a naběžachu sej lětsa wjace hač 2 800 eurow.
Při rjanym słónčnym wjedrje wotmě so hižo 12. Budyski běh z wutrobu we hłownej organizaciji Ludoweje banki Budyšin. Znowa nastajichu wobdźělnicy wjacore rekordy. Wjace hač 2 000 sportowcow Budyskich gymnazijow kaž tež Wjelećanskeho a Biskopičanskeho gymnazija a powołanskeje šule za hospodarstwo a techniku zmištrowachu prěni raz wjac hač 15 000 kołow, kóžde něhdźe 700 metrow dołhe. Jednotliwe mustwa wobstejachu z třoch běharjow, kotřiž so wotměnjejo jednu hodźinu za dobry zaměr angažowachu: tónkróć za Němski dźěćacy škitny zwjazk městne zjednoćenstwo Budyšin. Dalši rekord wobsteješe w naběžanych skoro 28 000 eurow. Z tychle pjenjez nałoža 80 procentow za projekty Němskeho dźěćaceho škitneho zwjazka. Zbytk rozdźěla na sobu skutkowace šule.
Prěnje domjace dobyće sezony
ST Marijina hwězda
– Arnsdorfske KT 2:0 (0:0)
Zestawa domjacych: O. Schmidt – Wróbl, Łušćanski, Jurš, Lipič, P. Schmidt, Bělk (66. Škoda), O. Hawš, Smoła, Winkler, Peschmann
Na šestym hrajnym dnju wokrjesneje ligi běchu koparjo z Arnsdorfa do Pančic přijěli. Trenar domjacych Tobias Škoda dyrbješe mustwo trochu přestajić, dokelž běchu někotři hrajerjo wupadnyli. Wosebje pak chcychu woni před swójskim publikumom skónčnje prěnje dobyće žnjeć. Wobaj cyłkaj nerwoznje započeštej, bórze pak hosćićel režiju přewza. Prěni naspomnjenjahódny nadběh zapisachmy sej w 24. min. Přez staciji Matijas Łušćanski a Stanij Smoła dósta so bul ke Křesćanej Bělkej, kiž trjechi z kónčkojteho kuta jenož wonkowny sak. Najebać dobre móžnosće přez Smołu (30.), Bělka (35.), Paula Schmidta (36.) a Falka Peschmanna (41.) pak hač do přestawki žane wrota njepadnychu. Znowa pokazachu so słabosće při zakónčenju nadběhow.
