Hižo dźewjaty króć wotmě so lětsa třinarodne wuměłske wubědźowanje pod hesłom „Legendarni rjekojo pomjezneje kónčiny“. Biblioteka Karkonoska w pólskej Jelenjej Górje kaž tež Towaršnosć za kulturu a dalekubłanje wokrjesa Zhorjelc je mjeztym hižo dlěši čas za dźěći a młodostnych přihotuje a přewjeduje.
Na mjezynarodnym projekće wobdźěleja so dźěći a młodostni z euroregiona Nysa. Zaměr wubědźowanja je zwyšić popularnosć rjekow, serbskeho kuzłarja Krabata a hórskeho ducha Kyrkonoša, kiž so čěsce Krakonoš a pólsce Rzepiór mjenuje.
Šulerjo Kulowskeje wyšeje šule „Korla Awgust Kocor“ wobdźělichu so lětsa druhi króć na tymle wubědźowanju, kotrež so hižo wot lěta 1996 wotměwa. Póndźelu, 29. smažnika, zetkachu so woni k wuměłskej dźěłarničce. K tomu běchu sej tež zastupjerjow z partnerskeje šule w pólskim Lubomierzu přeprosyli. Zhromadnje zaběrachu so z temu „Krabat a Kyrkonoš“. Poboku bě jim při tym Budyski wuměłc Marko Bruk, kotrehož bě sej nawodnistwo šule za wuměłskeho nawodu dźěłarnički zdobyło.
