„Cyły swět je jewišćo“ to bě tema předmjety zwjazowaceje wučby dotalneju rjadownjow 3a/4a Serbskeje zakładneje šule Budyšin. Z toho nasta wosebity musical, kotryž šulerjo kónc šulskeho lěta předstajichu.

Rjadowni 3a/4a Serbskeje zakładneje šule Budyšin zaběrachu so w předmjety zwjazowacej wučbje z temu dźiwadło. Jako­ prěnje wulećachu sej do Němsko-Serbskeho ludoweho dźiwadła a pohladachu zhromadnje z dźiwadłowej pedagogowku Heide-Simone Barthowej za kulisy­ a zhonichu, što so wšo takle pod a za jewišćom stawa. Wjeršk wulěta bě wopyt za probu „Poprjancowy muž“. Jónu běchu sej tež nana sobušulerki Miry Nowakec přeprosyli – Istvána Kobjelu, kiž zwučowaše z nimi wšelake hrajne sceny. Po swjatkach zahajichu šulerjo proby za swój jewišćowy wustup. Wučerce Petra Siprathowa a Gabriela Bajtlowa běštej za to mały musical „Hłupy Jank“ (Die goldene Gans) wupytałoj a zdźěla tež zeserbšćiłoj. Wšitke dźěći mějachu małe abo wjetše róle nawuknyć. Najlěpje pak spodobachu so jim lóštne spěwy, kotrež wone w chórje abo solistisce nazwučowachu.