Rěče kaž němčina, serbšćina, pólšćina a čěšćina Saksku charakterizuja. Nawodnica Sakskeho krajneho centruma za zažne kubłanje w rěči susodow, kotrež něšto dlěje hač lěto skutkuje, dr. Regina Gellrich ma tole za jónkrótne. Andreas Kirschke je so z njej rozmołwjał.
Kak je tónle krajny centrum nastał?
R. Gellrich: Naše korjenje tča w kubłanskej syći Pontes. Dokelž bu wona na projektowej bazy financowana, bě syć na euroregion Nysa wobmjezowana. Z nětčišim dźěłowym centrumom zdobywamy nowu kwalitu.
Što su jeho najwažniše nadawki?
R. Gellrich: Centrum wusměrja so na cyły sakski pomjezny rum. Zwěsćamy a systematizujemy wobstatk zažneho poskitka rěče susodow w dźěćacych dnjowych přebywanišćach. Zwjazujemy praktiske nazhonjenja a modele. Dźe nam wo dlěšodobny, na přichod wusměrjeny zhromadny zakład, rěče dźěćom wot małosće sem w sakskim pomjeznym regionje posrědkować.
Serbja dźěłaja wot lěta 1997 z modelowym projektom Witaj. Móže wón za pomjezny region přikład być?