Kajka to perspektiwa!

srjeda, 04. apryla 2018 spisane wot:
Mnohim je zajim sakskeho premiera a ministrow za projekt samozrozumliwy, nam Serbam pak nic. Wšako so wšědnje njestawa, zo chce prěni muž Sakskeje być informowany być wo nowym wuwučowanskim a wuknjenskim srědku, a nimo njeho hišće dalšej ministraj. To drje bě zeleny štwórtk rědki zjaw w stawiznach našeho ludu. Při tym bě ministerski prezident hakle krótko do prezentacije wučbnicy „Serbsce DIGITALNJE krok po kroku wuknyć – prawopis a gramatiku“ na zarjadowanje přeprošeny. To je normalne, wšako je to skerje fachowe polo ministrow. Na kóncu pak wuzbytkowaše sej Michael Kretschmer chwile za to, wo projekće a jeho perspektiwach zhonić. Na slědowacej konferency wotbłyšćowaše so wulke připóznaće ze stron dweju ministrow za spore dźěło a do přichoda pokazowacy projekt. Njech tomu přichodnje časćišo tak je! Milenka Rječcyna

Do hwězdarnje pućowali

srjeda, 28. měrca 2018 spisane wot:
Budyska hwězdarnja je stajnje zaso zajimawy cil. Tomu bě tež dźensa tak, jako přewje­dźe rjadownja 6-1 Serbskeho gymnazija Budyšin swój pućowanski dźeń do hwěz­darnje na kromje sprjewineho města. Tam wobhladachu sej přehladku a wobdźiwachu njebjo z hwězdami, kaž je wone tuchwilu nad Budyšinom widźeć. Jónkrótnu atmosferu wužiwachu šulerjo zdobom za čitanje, na kotrež su sej lektora Ludoweho nakładnistwa Domowina Michała Nuka přeprosyli. Wón je knihu Dougla­sa Adamsa „Pućnik po galaksiji“ sobu přinjesł, kotruž bě do serbšćiny přełožił­. Foto: SN/Maćij Bulank

Cuzosć z pomocu pisanja přewinyć

póndźela, 26. měrca 2018 spisane wot:

Radwor (SN/MiR). Za jendźelske słowo „arrive“ mamy w serbšćinje wjacore zapřijeća. Najlěpše drje je w padźe holcy z mjenom Philine słowo „dóńć“. To zhonichu na njedawnym čitanju na Radworskej wyšej šuli „Dr. Marja Grólmusec“ šulerjo 8. a 9. lětnika.

Wuměnjenja polěpšić

štwórtk, 22. měrca 2018 spisane wot:

Serbska rěčna šula je projekt, kotryž ma nawabić zajimcow-wučerjow, wosebje ze słowjanskeho wukraja, kotřiž chcyli na serbskich abo serbšćinu wuwučo­wa­cych šulach wučbu w serbskej rěči po­dawać. Mjeztym je prěnja zajimča z Čěskeje, kotraž bě so na projekt zwažiła, swoje zrěčenje ze sakskim šulstwom zaso wupowědźiła.

Wjesne žiwjenje bytostnje na přichod wusměrić

štwórtk, 22. měrca 2018 spisane wot:

Jeno zhromadne postupowanje ratarjow, politikarjow, ale wosebje tež wjesnych wobydlerjow a scyła přetrjebarjow tomu dopomha, zo wostanu wsy žiwjenjahódne městnosće.

Njebjelčicy (JK/SN). To bě jednohłósne měnjenje na kóncu wčerawšeho zazběha noweho rjadu kubłanskich zarjadowanjow pod hesłom „Žiwjenjahódna wjes – kak zamóže ekologiske ratarjenje zesylnić atraktiwitu wjesneho ruma“ na Njebjelčanskim gmejnskim zarjedźe.

Na druhi pospyt

štwórtk, 22. měrca 2018 spisane wot:

Prěni zaćišć je rozsudny, tež wo Serbskej rěčnej šuli (SRŠ). Čěska zajimča, prěnja, kotraž bě na namołwu do Łužicy přišła, zo by tu na serbskej šuli wuwučowała, njeměješe runjewon najlěpši start. Tuž je po njecyłym lěće swoje zrěčenje ze Sakskej zaso wupowědźiła. Přiwšěm, angažement za projekt SRŠ njeje jeno wšeje česće hódny, ale pře wšu měru trěbny. Spočatk kubłanišća – hodźi so wone tak mjenować, tež hdyž njeje hišće jako institucija zakótwjene? – wšak bě chětro kopolaty. Idealisća za SRŠ běchu z tym ličili, zo so zajimcy z wukraja, wosebje z faworizowaneje susodneje Čěskeje, na poskitk přizjewja. To by wobsahowy koncept za nawuknjenje serbšćiny a přiswojenje trěbneje wědy za wukonjenje wučerstwa w Sakskej tuž dyrbjał přihotowany być. Tomu drje tak njebě. Tak budźe wažne přichodnym zajimcam z tu- a wukraja lěpši prěni zaćišć wo SRŠ posrědkować. Milenka Rječcyna

Budyšin (SN/MiR). Zapósłanc Sakskeho krajneho sejma Marko Šiman (CDU) je iniciator projekta Serbska rěčna šula (SRŠ). Hižo wjacore lěta so wón intensiwnje za to zasadźa zdobywać wučerjow, kotřiž chcyli na serbskich a serbšćinu podawacych šulach w serbskej rěči wuwučować. Njedostatk při nawabjenju tajkich wučerjow je jeho k tomu nuzował wuwić naprawu. Jako projekt z perspek­tiwu widźi wón SRŠ. „Projekt wuchadźa z analyzy ličbow. 2012 zwěsćich, zo změjemy přichodne lěta masiwny wotchad wučerjow na wuměnk. Na uniwersitach dotal dosć wučerjow njewukubłuja. Tuž dyrbimy jednać“, rozłožuje Marko Šiman. Nastała je ideja wo Serbskej rěčnej šuli, kotraž kwalifikuje wukubłanych wučerjow z tu- a wukraja. Za to je sej wón partnerow pytał, Serbski institut, Serbske šulske towarstwo, Rěčny centrum WITAJ a Budyski wotrjad Sakskeho krajneho zarjada za šulu a kubłanje (LaSuB). Tam tuchwilu wjacore wučerki serbšćinu wuknu. Za někotre z nich je to wožiwjenje rěčnych znajomosćow, za dalše pak nowosć. Z kursom chcedźa wone docpěć, zo móža pozdźišo wšitke w serbskej rěči wuwučować.

Budyšin (CK/SN). Mnohotnosć poskitkow wuznamjenja kóždolětne wysokošulske wiki w Budyšinje. Mjeztym 21. je zańdźenu sobotu wulku syłu zajimcow přiwabiła. Loreen Richter by rady jura studowała. Abiturientka ze Zhorjelca bě ze swójbnymi na Budysku dźěłowu agenturu přišła. „W Zhorjelcu předstajeja so jenož regionalne wysoke šule, w Budyšinje je mnohostronskosć wustajerjow wjele wjetša“, 18lětna šulerka potwjerdźi. Na stejnišću Viadriny Frankfurt nad Wódru je so wona za móžnosćemi studija we wukraju wobhoniła. Studijna poradźowarka europskeje uniwersity měješe jej na mnohe klasiske prašenja kaž tež k němsko-pólskemu studijej juristiki wotmołwić. „Zajim za mjezy­narodnosć přiběra“, rjekny Kerstin Richter z Viadriny. To wobkrućeja ličba 1 700 wukrajnych ze 6 500 studentow Viadriny, kotřiž pochadźeja z 95 narodow, ale tež mjezynarodne wotzamknjenja. Na stejnišću Braniborskeje techniskeje uniwersity (BTU) Choćebuz-Zły Komorow běchu přede­wšěm socialne předmjety a studijne směry na polu wobswěta prašane.

Přidružnik-wučer so stać

pjatk, 16. měrca 2018 spisane wot:

Sakska pyta za wučerjemi, tuchwilu po tysacach. Za jednu móžnosć swobodny stat ma přistajić přidružnikow. Štyri hač do pjeć lět maksimalnje tomu hišće tak budźe. Potom budu wiki z wučerskim personalom nasyćene hač na wěste předmjety, kaž přirodowědne.

Budyšin (SN/MiR). To rozłoži wčera popołdnju koordinatorka Budyskeje wonožki Krajneho zarjada za šulu a kubłanje (LaSuB) Monika de Boer. Wosebje prašani su přidružnicy za zakładne, wyše a spěchowanske šule. We wobłuku gymnazijow a powołanskich šulow je potrjeba w dalokej měrje kryta. Fachowča dale rjekny: „Štóž ma znajomosće serbšćiny, je wosebje požadany. W šulach ze serbskorěčnym poskitkom je potrjeba wučerjow wosebje wulka.“

Opozicija program kritizuje

štwórtk, 15. měrca 2018 spisane wot:

Naprawy sakskeho knježerstwa njejsu frakcijam wuzrawjene dosć

Drježdźany (SN/MiR). Starosć wo přichod našich šulow zaběraše wčera dopołdnja njecyłej hodźinje Sakski krajny sejm. Jedne ćežišćo při zdobywanju wučerskeho dorosta a młódšich wučerjow scyła je, zo móža so wučerjo pod 42 lětami wot 1. januara 2019 za zastojnistwo rozsudźić. To zwurazni sakski minister za kultus Christian Piwarz (CDU) w swojej fachowej knježerstwowej rozprawje z programom „Nastup w ćežkim času – nowe impulsy za kubłanski kraj Saksku“.

nawěšk

nowostki LND