Drježdźany (SN). Serbske šulske towarstwo (SŠT) přewozmje wot spočatka měrca nošerstwo serbskeje dźěćaceje dnjoweje skupiny w sakskej krajnej stolicy. Tam su so wšitcy wobdźěleni předwčerawšim zetkali, zo bychu so zeznali.
Čłonojo Drježdźanskeho towarstwa „Stup dale“, předewšěm starši, kotřiž dadźa swoje dźěći w skupinje kubłać, zwuraznichu swoje wjeselo: Nětko móža swoju dźowku abo syna dale do dnjoweje skupiny słać. Kubłanišćo a zetkanišćo towarstwa wostanjetej na dotalnym městnje w Drježdźanskim nowym měsće. Starši zwuraznichu, zo so za poskitki kubłanskeho srjedźišća LIPA w Smjerdźacej runje tak zajimuja kaž za dalekubłanske a medijo-pedagogiske poskitki Serbskeho šulskeho towarstwa a LUCIJE. Ze swojim angažementom w Drježdźanach na dobro serbskich a serbšćinu wuknjacych dźěći zaručatej towarstwje zwonka Łužicy wosebje hódny serbskorěčny rum.
„Nam je wažne, być partner wšitkim staršim, kotřiž chcedźa swojim dźěćom serbsku rěč a kulturu posrědkować“, rjekny předsydka SŠT Katharina Jurkowa na kromje zetkanja.
Wojerecy (AK/SN). Korony dla je dźeń wotewrjenych duri Wojerowskeho křesćanskeho kubłanišća Johanneuma zańdźenej lěće wupadnył. Sobotu pak běše skónčnje zaso móžny. Z „Gloria, Gloria – wotewri durje“ witachu hwězdni spěwarjo katolskeje wosady „Swjata swójba“ hosći. „Lětsa swjećimy sedme lěto wobstaća. Loni smy prěnich wotchadnikow 10. lětnika rozžohnowali. Integraciju wyšeje šule we wšědnej praksy mam za derje poradźenu“ z tutymi słowami zahaji Katharina Voß, zastupowaca nawodnica wyšeje šule, zarjadowanje. W Johanneumje samym gymnazij a wyša šula po jeje nazhonjenjach derje kooperujetej. Direktor gymnazija Johanneuma Günter Kiefer hladajo na to praji: „W někotrych wobłukach hišće wuknjemy. Posedźenja šulskeho wjednistwa a cyłkownu wučersku konferencu prawidłownje zhromadnje přewjedźemy.“