Smochćicy (SN/CoR). Kotre wupłody a problemy přinjese imersija hornjoserbšćiny na kubłanišćach? Na tajke a dalše prašenja je wčera na prěnjej fachowej konferency Serbskeho šulskeho towarstwa (SŠT) a Domowiny pod hesłom „Dyrbimy rěčeć!“ něhdźe 60 wobdźělnikow w Smochčanskim kubłanišću swjateho Bena wotmołwy pytało. Referentka za kubłanje Domowiny Katrin Suchec-Dźisławkowa a jednaćel SŠT Andreas Ošika staj nazhonite kubłarki kaž tež wukubłanče Serbskeje fachoweje šule za socialnu pedagogiku, staršich a fachowcow na polu dwurěčneho kubłanja witałoj. ­Jako prěni input předstaji nawodnica Rěčneho centruma WITAJ dr. Beata Brězanowa přednošk swojeje schorjeneje sobudźěłaćerki Jadwigi Kaulfürstoweje. Wona jenož njeskedźbni na woteběracu ličbu dźěći, kotrež so dźensa po metodźe imersije kubła, ale tež na to, zo „njehodźi so imersija prosće přeco na kubłanišćach přesadźić“. Franciska Hencyna powědaše wo swojich dobrych nazhonjenjach jako němska mać dweju Witaj-dźěsći, kotrejž so dźensa na Budyskim Serbskim gymnaziju dale serbskorěčnje wukmanitej.

Powołanska orientacija za šulerjow je minjeny čas ćerpjeła. Pandemije dla běchu poskitki přehladkow, praktikumow a informaciskich zarjadowanjow wobmjezowane. Po wšěm zdaću su wučerjo Ralbičanskeje wyšeje šule problem spóznali a sej na něšto noweho zwažili. Wčera přewjedźechu prěni raz powołanske wiki z pře­wšo dobrym wothłosom. Přeprosyli běchu sej tam předewzaća a institucije z regiona, kiž su wopytowarjam powołanske puće w domiznje pokazali. Młodostni njetrjebaja so hižo do cuzby podać, ale móžnosćow je w Hornjej Łužicy nadosć. A wězo móža w mnohich zawodach swoju maćeršćinu nałožować. Tak hodźa so rěčne rumy zachować a skrućić. A to je wjac hač trěbne. Tuchwilu dožiwjamy w redakciji Serbskich Nowin napjate połoženje, při čimž je dale a ćešo ludźi namakać, kotřiž sej zwaža serbsce pisać. Snano sej tón abo tamny zaso pjera přimnje, dokelž serbšćinu jenož w šuli njenałožuješ, ale tež po šuli w powołanskim žiwjenju. Bianka Šeferowa

Ze sportowym swjedźenjom, kombinowanym z modernym geocachingom, su so šulerki a šulerjo Worklečanskeje wyšeje šule „Michał Hórnik“ dźensa do nazymskich prózdnin rozžohnowali. Na pjeć stacijach wužiwachu woni přirodne maćizny za sportowe zaběry a zasadźichu načasnu GPS-techniku, zo bychu za to prawe městna namakali. Foto: Feliks Haza

Choćebuz (SN/at). Z rapom „Pógibowanje – dobre za derjeměśe“ maja delnjoserbscy wuwučowacy na online-platformje Dialog-BB nowy dodatny material za wučbnicu „Pó droze 2“ k dispoziciji. Kaž Choćebuske Dźěłanišćo za kubłanske wuwiwanje (ABC) informuje, je serbski rapar a hip-hop-spěwar Jakub Gruhl trěbnu hudźbu napisał a ju nahrawał. Wón je znaty za swoje pěsnje na basnje Miny Witkojc. Wony energiski sportowy spěw je hudźbnik w swojim studiju Ectoplastic UG w Halle nad Solawu produkował. Rap hodźi so wužiwać „w modernej wučbje za spěwanje, pohibowanje abo rejwanje“, ABC dale zdźěli a wupraja wočakowanje, zo snadź „móže wuknjacych nastorčić, sami raz rapować“.

Na mjenowanej online-platformje je ABC nimo toho šěsć nowych dźěłowych łopjenow za bilingualnu wučbu wěcna wěda spřistupniło, kotrež je Ulrike Niedlich ilustrowała. Serija dźěłowych łopjenow wěcna wěda poćahuje so dotal na počasy a adwentny zešiwk, nětko přidružitej so dźělej šulski zastup a swójba. Łopjena su wusměrjene mjez druhim na ertny a pisomny rěčny trening.