Stary a nowy dźěl stej jednota

póndźela, 29. awgusta 2022 spisane wot:

Po lětomaj twarskeho časa Boščansku zakładnu šulu přepodali

Bošecy (CS/SN). Citat z ewangelija po swjatym Mateju „Dajće dźěćatkam ke mni přińć“ pyši serbsce zachodne durje stareje Boščanskeje šule, kotruž su 1897 wotewrěli. 125 lět pozdźišo su minjeny pjatk tule we wjesnym dźělu Kubšiskeje gmejny znowa wotewrjenje swjećili. Z nowym přitwarom móže kubłanišćo nětko do přichoda hladać. Ale tež stary dźěl su do přitwara zapřijeli. Wobě tworitej jednotu. Dohromady 120 dźěći wot 1. do 4. lětnika, mjez nimi 22 nowačkow, ma wulkotne wuměnjenja. Tak maja mjez druhim hnydom pódla jědźernje šulsku kuchnju, biblioteku tež ze serbskej literaturu a kompjuterowy kabinet z 28 městnami. Tež tablety tu su. Cyłkowna digitalizacija z interaktiwnymi taflemi ma hač do kónca lěta wotzamknjena być.

Hotuja so na nowe šulske lěto

pjatk, 26. awgusta 2022 spisane wot:

Jutře je tak daloko a poslednje pěstowarske lěto so za šulskich nowačkow zakónči. W předšulskim tydźenju su so sakske zakładne šule na nowačkow šulskeho lěta 2022/23 hotowali a projekty kaž tež cyłodnjowske poskitki přihotowali

Chcedźa pólsku šulu załožić

wutora, 23. awgusta 2022 spisane wot:

W Braniborskej wuknje dźeń a wjace šulerkow a šulerjow pólšćinu. Tuchwilu je jich něhdźe 3 000 holcow a hólcow, nimale 300 wjace hač w šulskim lěće 2017/2018, kaž kubłanske ministerstwo wčera na naprašowanje frakcije CDU w Krajnym sejmje Braniborskeje zdźěla.

Podstupim/Frankfurt nad Wódru/Choćebuz (RD/SN). Pólšćinu wuwučuja w susodnym zwjazkowym kraju na dohromady 30 šulach. Sydom je w Frankfurće nad Wódru, štyri w Choćebuzu. W delnjołužiskej metropoli su to Łužiska sportowa šula, zakładnej šuli „Wilhelm Nevoigt“ a „Regine Hildebrandt“ kaž tež Humboldtowy gymnazij. Poslednjej mjenowanej kubłanišći matej status Europskeje šule.

Město Frankfurt planuje dalše intensiwowanje teje rěčneje wučby w swojich komunalnych kubłanišćach. Předwidźane je załožić pólsku zakładnu šulu, kaž Milena Manns, njestronska decernentka za kulturu, kubłanje, sport, wobdźělenje wobydlerjow a Europu do lětnich prózdnin wozjewi.

Zajim za pólšćinu

wutora, 23. awgusta 2022 spisane wot:
Ličba šulerkow a šulerjow, kotřiž w šuli pólšćinu wuknu, w Braniborskej přiběra. To je zwjeselacy fakt. W Frankfurće nad Wódru to tuchwilu samo za kóždeho sedmeho wuknjaceho płaći. Při tym hrajetej wězo status města a jeho wuske styki k susodnym Słubicam na tamnym pobrjoze Wódry wažnu rólu. Dobre susodstwo hodźi so ze znajomosćemi w rěči tamneho wo wjele lěpje pěstować, hač hdyž sy stajnje na přełožk pokazany. Dźěćom zakładnu rěčnu wědu spo­srědkować je prawy puć. A tohodla zda so předwidźane wu­tworjenje noweje bilingualneje němsko-pólskeje šule w Franfurće mudry rozsud być. Zo słuša Choćebuz ze štyrjomi kubłanišćemi runje tak k ćežišćam w Braniborskej, dźe-li wo nawuknjenje pólšćiny w šuli, zasłuža sej respekt. Škoda jenož, zo Delnjoserbski gymnazij pódla njeje. Wšako hodźało so tam na bliskosć delnjoserbšćiny k pólšćinje derje natwarić. Zakładnej šuli „Wilhelm Nevoigt“ a „Regine Hildebrandt“ pak wobě rěči poskićatej. Axel Arlt

Rjad projektnych dnjow zahajili

srjeda, 17. awgusta 2022 spisane wot:

Serbski eksperiMINT campus w Radworju, jedyn z třoch projektow, kotryž Załožba za serbski lud we wobłuku spěchowanskeho programa „Serbska rěč a kultura w strukturnej změnje“ w Sakskej spěchuje, je wčera zaběžał.

Jedna so wo wulkoprojekt, kotryž Radworska staršiska iniciatiwa zhromadnje z Radworskim dwórnišćom inkluzije přewjedźe. Zaměr je dźěćom z rozdźělnymi rěčnymi znajomnosćemi serbšćinu zbližić. To so najlěpje při zhromadnych aktiwitach poradźi. Tuž přeprosychu organizatorojo wčera na prěni z třoch próz­dninskich poskitkow pod titulom „Dźiwje płody a rostliny“.

Z wěcnu wučbu

srjeda, 10. awgusta 2022 spisane wot:
Budyšin (SN). Krótko do zahajenja noweho šulskeho lěta změja šulerjo zakładnych šulow za wěcnu wučbu nowu wučbnicu. Ludowe nakładnistwo Domowina wuda w Rěčnym centrumje WITAJ zdźěłane licencne wudaće z nakładnistwa Schroedel „Mlóč 2“. Wučbnica wabi ze swojej wjacebarbnosću. W njej wobjednawaja wobłuki wučbneho plana za wěcnu wučbu w 2. lětniku kaž zhromadnje žiwi być a wuknyć, ćěło a strowota, rostliny a zwěrjata, fenomeny nježiweje přirody, rum a čas a kompjuterowy kurs. Zapřijate su wobłuki za skrućenje wědy a zwjazanje z mnohimi, w knize podatymi, temami. Kniha je w Smolerjec kniharni w Budyšinje na předań.

Nowe ideje za wšědny outfit

srjeda, 10. awgusta 2022 spisane wot:
Kak hodźa so dźěle serbskeje narodneje drasty do dźensnišeho moderneho časa přenjesć, bě hłowne prašenje wčerawšeho prózdninskeho poskitka Budyskeho Serbskeho muzeja. Při tym nawjazachu na aktualnu wustajeńcu „Party w 21. lětstotku“. Pod nawodom Moniki Ošikoweje (srjedźa) zhotowi horstka wobdźělnikow toški za šmóratko, rjećazki wokoło ruki abo šije kaž tež nawušnicy. Samsny poskitk ­wospjetuja 23. awgusta wot 10 hodź. Foto: SN/Hanka Šěnec

Drježdźany (SN/MiR). W Budyskej wotnožce sakskeho krajneho zarjada za šulu a kubłanje LaSuB pytaja dale za wučerjemi. Wšako je na statnych šulach w Hornjej Łužicy hišće tójšto městnow za wučerjow njewobsadźenych. Za region w zamołwitosći LaSuB je aktualnje wjace hač 200 městnow swobodnych. Dotal njeje so ani třećina zajimcow za nje přizjewiła. Byrnjež so wuměnjenja za wuwučowanje na šulach polěpšili, pytaja młodźi wučerjo skerje za ­móžnosću we wulkich městach, kaž w Drježdźanach a Lipsku, wuwučować. Tomu wotpomhać chce Sakske ministerstwo za kultus (SMK) z online-portalom LEO.SAX. Kaž SMK zdźěli, je so poradźiło po tymle puću dotal w Sakskej 5 000 nowych wučerjow přistajić. „Online-portal nas přewšo derje při zwoprawdźenju wšelkich programow a paketa naprawow sakskeho knježerstwa k zdobywanju wučerjow podpěruje“, rjekny sakski statny minister za kultus Christian Piwarz (CDU), „chcemy postupować zhromadnje ze statnej kencliju Sakskeje a dale wuwiwać portal kaž tež digitalizaciju postupowanja zarjadnistwa.

Prowinca je „in“!

póndźela, 08. awgusta 2022 spisane wot:
Cyle rozdźělne su dźensa dźěłowe městna organizowane. Na swojim mam stajnje a dale ležo před sobu poćišćanu papjeru. Pohladnu pak na pisanske blido swojeho młodeho kolegi, wuhladam tajku lědma. Trend časa je, měć tak wjele datow kaž móžno w digitalnych medijach składowane. A tak je to tež, kaž to požadanska platforma LEO.SAX pokazuje, na polu požadanjow za wučerjow. Tysacy powabjeja so tam online, kotřiž chcedźa jako wučerjo skutkować. Derje tak! Tola z kotreje přičiny so jenož mało z nich za skutkowanje na šuli w mjeńšim měsće abo na wsy zajimuje? Hej, młodźi wučerjo! Tež w prowincy je doba digitalizacije zaćahnyła. Šule tam su po wjetšinje modernje wuhotowane, haj, twarja samo nowe kubłanišća. Jedna lěpšina wuwučowanja na wsach je, zo maja rjadownje husto po ličbje mjenje šulerjow hač we wulkich městach. A na kubłanišćach znaja wučerjo hišće mjena wšitkich šulerjow a tak dale. Potajkim: prowinca je „in“! Milenka Rječcyna

Po wukubłanju wuswědčenja LEAG přijimali

póndźela, 08. awgusta 2022 spisane wot:

Choćebuz (SN). Po tym zo běchu minjene tydźenje swoje zakónčace pruwowanja wuspěšnje absolwowali, su minjenu srjedu 50 wuwučenym fachowym dźěłaćerkam a dźěłaćerjam Łužiskeje Energi­joweje a hórnistwoweje AG a Łužiskeje energijoweje milinarnje AG (LEAG) k startej do powołanskeho žiwjenja gratulowali. Po dwulětnej přestawce korony dla sta so to tónraz zaso we wobłuku swjatočneho akta, zdźěli nowinski rěčnik LEAG Thoralf Schirmer. Młodostni z Braniborskeje a Sakskeje běchu do Borborineje žurle Choćebuskeho zarjada LEAG přeprošeni, zo bychu swoje wuswědčenja wot personalneho wotrjadnika LEAG ­Jörga Wanieka přijeli.

Serbska debata

nowostki LND