Budyšin (CS/SN). Konrad Domrös (zady nalěwo) je z Michendorfa pola Podstupima přijěł, jeno zo móhł wysokošulski dźeń Statneje studijneje akademije w Budyšinje wopytać. Šuler 12. lětnika wě hižo jara dokładnje, što wón chce. Z chorownju Charité w Berlinje ma wón hižo kruteho partnera poboku. W Budyšinje chce wón tohodla medicinisku techniku studować. Prof. Daniel Raabe (stejo) a kolega Mahdi Abdel-Hag, zastupnikaj wotnožki mediciniskeje techniki, staj zajimowanym gymnaziastam z pospytom dohlad do maćiznoweje techniki skićiłoj.

Kóžde lěto spočatk januara zarjaduja po wšej Němskej dźeń wysokich šulow. Šulerjo 11. a 12. lětnika dóstawaja swobodny dźeń, zo móhli so po wšelakich kubłanišćach rozhladować. Direktorka Budyskeje powołanskeje akademije prof. Barbara Wuttke rěči wo hoberskim nawalu. Za zahajacy přednošk dyrbjachu sej wjetšu rumnosć pytać. Přičina wulkeho wothłosa móhła być, zo ma so Budyska akademija wot 2025 z wysokej šulu stać. Tak móhli studenća tam wukubłanje z masterskim studijom zwjazać.

Druhe městno sej wudobyli

srjeda, 10. januara 2024 spisane wot:
W Kamjencu wotmě so wčera dopołdnja na zakładnej šuli „Při Boršći“ sportowe wubědźowanje „Mach mit – čiń sobu“ we wobłuku sakskeho šulskeho wubědźowanja „Młodźina trenuje za olympiju a paralympics“. Mjez wobdźělnikami běchu tež šulerki a šulerjo 2. do 4. lětnika Serbskeje zakładneje šule „Michał Hórnik“ z Worklec. Nimo stafloweho běha z wšelakorymi přidatnymi nadawkami dyrbjachu dźěći wušiknosć a koordinaciju dopokazać. Tak bě jedna z disciplinow skakanje z powjazom. Na kóncu zaměstnichu so serbscy šulerjo a šulerki na druhim městnje. Dobyło je šulsko sportowe zarjadowanje hosćićel z Kamjenca. Foto: Tadej Cyž

Jurkowa: Wuměna wažna

wutora, 09. januara 2024 spisane wot:
Chrósćicy (SN/MiR). Sakske šulske postajenje ma so nowelěrować. Z tym zaběra so hižo dlěje hač lěto předsydstwo Serbskeho šulskeho towarstwa (SŠT) zhromadnje z Domowinu jako čłon wodźenskeje skupiny pola Sakskeho ministerstwa za kultus. „Zo bychmy postajenje aktualnym wuměnjenjam přiměrili a zdobom akcenty za perspektiwu serbskeho šulskeho kubłanja sadźeli, mamy wobšěrnu diskusiju za wažnu“, rjekny na naprašowanje předsydka SŠT Katharina Jurkowa. Tuž su wčera wječor na Chróšćanskim gmejnskim zarjedźe zhromadnje z nawodami resp. zastupjerjemi wšitkich serbskich zakładnych a wyšich šulow kaž tež Budyskeho Serbskeho gymnazija nazhonjenja, měnjenja a ideje wuměnili. „Mjez druhim zwěsćichmy, zo dyrbimy kóždu serbsku šulu indiwiduelnje pohódnoćić, dokelž ma kóžde kubłanišćo hinaše wuměnjenja a potrjebu“, Jurkowa wuzběhny. Jedne ćežišćo diskusije běše zdobywanje dorosta za nawodne funkcije na kubłanišćach. W tym zwisku chce předsydstwo SŠT Krajny zarjad za šulu a kubłanje (LaSuB) namołwić, so sylnišo angažować a jednać.

Płomjo z nowym layoutom

pjatk, 05. januara 2024 spisane wot:
Budyšin (SN). Z januarskim wudaćom prezentuje so serbski dźěćacy časopis „Płomjo“ w nowym layouće. Design titulneje strony z logom bu dospołnje předźěłany, ale tež někotre woblubowane rubriki kaž ta za 1. lětnik abo strona z dopisami čitarjow dóstachu moderniše wuhotowanje. „Změny w layouće je Budyske sadźbowe studijo Kontrapunkt namjetowało, kotrež časopis staja. Smy je rozjimali a přiwzali“, rozprawja redaktor Płomjenja Pětr Šołta. Z tym maja so šulerki a šulerjo po 15 lětach zaso raz na nowy napohlad swojeho časopisa zwučić.

Ze sobu, nic pak wo druhim rěčeć

štwórtk, 04. januara 2024 spisane wot:

Krótko do hód, 19. decembra 2023 witachu šulerjo a wučerjo Serbskeje wyšeje šule Ralbicy wosebitych hosći. Běchu sej do wučby stawiznow a towaršno­wědy towarstwo Swědkojo ćěkańcy z Drježdźan přeprosyli a z tym wuměnu z ćěkancami.

Kubłarka w dźěćacym domje

srjeda, 03. januara 2024 spisane wot:

Hižo wot lěta 2018 dźěła młoda Sernjančanka Damaris Gerlichowa jako kubłarka w dźěćacym domje „Dźećelowe łopješko“ w Kamjencu. Wona stara so tam mjez druhim wo dźewjeć dźěći a młodostnych w starobje dwanaće do 17 lět.

„Naš team kubłarjow a kubłarkow je dźěćom stajna a kruta podpěra we wšitkich žiwjenskich situacijach. Bydlimy tu z nimi hromadźe w jednym domje, w kotrymž zeznaja dźěći prawidłowne wotběhi wšědneho zhromadneho žiwjenja a nawuknu w tutym zwisku zamołwitosće přewzać. Kóžde dźěćo je na swoje wašnje wosebite a tuž smy hladajo na fleksibilitu a spontanitu wulce wužadani. Přewjedźemy z dźěćimi tež zhromadne projekty, wopytamy jich staršiske wječory w šulach, přewodźamy je k lěkarjej abo jědźemy z nimi do dowola.“

Žana wučba po biorytmusu

srjeda, 27. decembera 2023 spisane wot:

Kak wupada šula přichoda? Z tutym prašenjom je so loni pjeć regionalnych kubłanskich forumow zaběrało. Sakski kultusowy minister Christian Piwarz (CDU) je wuslědki krótko do hód předstajił.

Drježdźany (SN/MiR). Wuslědki wuradźowanja su kultusej wažny zakład za pisanje strategiskeje papjery k dalewuwiću šulskeho kubłanja w Swobodnym staće Sakska. Klětu w januaru chce kultus dokument předpołožić.

Wobdźělnicy a wobdźělniče kubłanskich forumow mějachu nadawk kotre poručenja fachowcow bychu so woprawdźe do wšědneje praksy hodźeli. W cyłku zaběrachu so z 218 namjetami, kotrež běchu ekspertowi radźićeljo do toho předpołožili. Tónle wjaceschodźenkowy zjawny poradźowanski proces je dźěl projekta „Kubłanski kraj Sakska 2030“. Mjez ekspertami, kotřiž w skupinach wuknjenje, wodźenje, profesionalizowanje a infrastruktura dźěłachu, běštaj nawoda Budyskeho Serb­skeho gymnazija René Wjacławk (wodźenje) a nawodnica Wojerowskeje zakładneje šule „Handrij Zejler“ Petra Šenkowa (infrastruktura).

Wjac hač rěčna folklora

pjatk, 22. decembera 2023 spisane wot:
Dźěći z pěstowarnje, kotrež na swjatočnych zarjadowanjach serbsce spěwaja, su nic jenož w srjedźnej Łužicy hižo lětdźesatki dołho najwoblubowaniši kulturny wjeršk. Runje tam, hdźež je so naša maćeršćina dawno z wšědneho dnja pozhubjała, prajimy rady, so wozrodźenja nadźijejo: Wone su naš přichod. Nažel tomu dotal lědma tak běše, a tohodla so radšo nichtó njepraša, štó wot tych něhdy jónu tak prezentowanych dźěći jako dorosćeny serbuje. Móžemy wěčnje wo strukturach kubłanja diskutować, ale dołhož so dotal (přewažnje) němcowacy dorosćeni njerozsudźa, wědomje so do rěče wótcow wróćić, je wšo za stareho Frycu. Tohodla je jara zwjeselace, zo dale a wjac dorosćenych serbsce wuknje – a hustodosć tež dale a intensiwnišo. Tući móža tež swoje dźěći a wnučki w komunikaciji wšědneho žiwjenja tak přewodźeć, zo njewostawa serbowanje w pěstowarni jenož hra a rěčna folklora. Ale, zo budźe to start do žiwjenja w serbskim duchu. Marcel Brauman

Wulki nawal na nowu zběrku „Ja – Ich“

štwórtk, 21. decembera 2023 spisane wot:

Radwor (SN/bn). „Štó ja sym?“ bě prašenje, na kotrež su šulerki a šulerjo Radworskeje wyšeje šule „Dr. Marja Grólmusec“ we wobłuku projekta „Naša serbska kniha“ literarisce wotmołwili. Z nastatych tekstow – přewažnje krótkopowědančka a někotražkuli baseń –, kaž tež ze samo zhotowjenych rysowankow su zběrku „Ja – Ich“ zestajili. Wčera su ju w kopaće połnym Radworskim Dwórnišću inkluzije premjernje předstajili.

Šulerki a šulerjo Serbskeje wyšeje šule Ralbicy wjesela so nad nowozarjadowanej biblioteku a nowymi knihami. We wobłuku swojich cyłodnjowskich poskitkow dóstachu polcy za knihi a móžnosće k sedźenju. Nimo šulerjow je tež Załožba za čitanje z Mainza knihi dariła. Dohromady maja jich wjace hač 300. Biblioteka je stajnje wutoru a pjatk w přestawkach wočinjena. Zajim za knihi mnohich šulerjow do biblioteki wabi a k wuměnje w přijomnej atmosferje pozbudźa. Foto: Julija Serbinec

Serbska debata

nowostki LND