Nowy nawoda
Slepo (SN/MiR). Jan Hrjehor budźe nowy nawoda Wyšeje šule „Dr. Marja Grólmusec“ w Slepom. Wčera po připołdnju je wón w regionalnej wotnožce Krajneho zarjada za šulu a kubłanje Budyšin dźěłowe zrěčenje podpisał. Wot 1. měrca budźe w nowym zastojnstwje skutkować. Dotal bě na Slepjanskej wyšej šuli fachowy wučer za sport a serbšćinu. Mjeztym skutkuje tam třeće šulske lěto.
Wot 24. februara, wot spočatka druheho šulskeho połlěta 2019/2020, tuchwilny nawoda kubłanišća Wolfgang Goldstein Jana Hrjehorja jako noweho šulskeho nawodu přez cyły tydźeń zadźěła. Nětko w prózdninskim času staj přepodaće hižo přihotowałoj. Wosebitosć nimo toho je, zo zaćahnu šulerjo přichodnu póndźelu zhromadnje z Janom Hrjehorjom jako nowym nawodu do noweho Němsko-Serbskeho šulskeho kompleksa „Dr. Marja Grólmusec“.
W prózdninach do horta
Horty w serbskich a serbšćinu posrědkowacych dźěćacych dnjowych přebywanišćach su w zymskich prózdninach woblubowany cil šulskich dźěći. Wšako poskićeja tam kubłarki a kubłarjo jara wotměnjawy program.
Chrósćicy/Ralbicy (SN/MiR). W Chrósćicach na přikład su dźěći hromadźe warili a sej filmowu komediju wobhladali. Dalši dźeń pućowachu po wsy, doniž njejsu na piknik pola kubłarki załožili. W Budyšinje dožiwichu wone w dźěćacej knihowni putace čitanje.
Dźěćom a młodostnym poboku
Biskopičanska dźěćaca a młodźinska syć je powšitkownowužitny a nadregionalnje připóznaty swobodny nošer młodźinskeje pomocy. K partneram słušeja tež serbske cyłki kaž Pawk.
Biskopicy (SN/mwe). Na konferencu wo najwažnišich předewzaćach a zarjadowanjach we wobłuku dobrowólnych socialnych słužbow, šulskeho socialneho dźěła, partnerstwow za demokratiju, mobilneho škita młodźiny a dyrdomdejskeho campa bě teamowy šef Biskopičanskeje dźěćaceje a młodźinskeje syće „KiJu-Netzwerk“ Andreas Mikus wčera nowinarjow přeprosył. K hižo wjelelětnym spušćomnym partneram słušeja tež serbske cyłki kaž młodźinske towarstwo Pawk, šule a zarjadnistwa w dwurěčnej kónčinje kaž tež młodźinske kluby, mjez druhim w Pančicach-Kukowje.
Wšako su mjez něhdźe 100 dobrowólnu słužbu wukonjacymi tež serbscy młodostni a wosebje woblubowany je pola dźěći z Ralbic a wokoliny kóždolětny dyrdomdejski camp při Němskopazličanskim wulkohaće. „To je městnosć za wjele aktiwitow, wotměny, kreatiwity – ale tež za wočerstwjenje, prawy dyrdomdej a wjeselo“, w flajeru mjez druhim rěka.
Wuměłstwo w lutowarni widźeć
Mali wuměłcy tworja za wulki projekt
Stróža (SN/MiR). W Stróži nastawa tuchwilu nowa kubłanska a přirodowa šćežka. Jeje wosebitosć budu wšelakore interaktiwne elementy a wunoški z mnohich dźěłarničkow, kotrež so w biosferowym rezerwaće Hornjołužiska hola a haty, kaž w tymle tydźenju, wotměwaja. W Domje tysac hatow maja wosom młodych wuměłcow mjez šěsć a dwanaće lětami z wokolnych wsow, z Drježdźan a Zhorjelca dobre wuměnjenja. Ida Harrecker z Drježdźan zhotowja skicu k swojemu powědančku z titlom „To, štož kóždy njewidźi“. Konrad Hacker z Bukojny (Buchwalde) pak dźěła na wuměłskej twórbje za swoje powědančko „Karp Blub“. Skicy so na linolej přenjesu a tak nastawa linolorězba.
W Čornym Chołmcu šulerjo wo Krabaće wuknu
Čestnohamtsce skutkowacy zajimcy podpěruja team sobudźěłaćerjow w Krabatowym młynje
Mnozy šulerjo z cyłeje Sakskeje su loni wo Krabaće wuknyli, su zeznali powědki wo nim, ale tež wo Serbach. Kubłanske dźěło na dožiwjenskim statoku Krabatowy młyn Čorny Chołmc ma wysoku hódnotu.
Z mnohimi projektami a poskitkami je dožiwjenski statok Krabatowy młyn Čorny Chołmc loni docpěł něhdźe 2 400 šulerjow. Předewšěm dźěći z 5. a 6. lětnikow je wužiwaja. Nimo šulow z bliskich městow a wsow su tam tež rjadownje z Drježdźan, Coswiga a Zhorjelca byli. „Kubłanske dźěło ma za nas wulku hódnotu a je nam markowe znamjo. Z tym wabimy do zjawnosće a chcemy je wobstajnje dale wuwiwać“, potwjerdźa jednaćel zarjadnišća Tobias Ćižik.
Chcedźa dale zhromadnje dźěłać
Budyšin (SN). Z časa přewróta je Budyska Serbska fachowa šula za socialne zwjazana z dr. Hubertusom Šenkom. Wosebite zasłužby ma wón při wukubłanju serbskorěčnych kubłarjow a kubłarkow. Wosebje dowěrliwe zhromadne dźěło měješe mjez druhim z Miłočanskim Křesćansko-socialnym kubłanskim skutkom (CSB).
IT-technika za serbske institucije
Do rjadu sto wustajerjow na lětušich wikach Nawi přichoda w Budyskej powołanskej akademiji (BA) słušeše posłužbowe předewzaće Infotech, załožene před 25 lětami w Zhorjelcu. Wone słuša do kruha nawjedowacych předewzaćow po cyłej Sakskej a Braniborskej w branši.
Budyšin (CS/SN). Sebastian Michel z Budyšina, kiž je předewzaće na tudyšich wikach zastupował, bě sam na Budyskej BA studował. Předewzaće Infotech je partner za praksu za tele kubłanišćo, a to mjeztym 15 lět. Dobre zwiski wudźeržuje Infotech tež ze serbskimi institucijemi. „Instalujemy soft- a hardware kaž tohorunja internetne zwiski za Ludowe nakładnistwo Domowina a za Załožbu za serbski lud“, wón rozłoži. W pismach su serbske znamješka drje předinstalowane, ale wone so do mejlowych adresow zatwarić njehodźa. To pak za wšitke pisma z wosebitymi znamješkami płaći. Na stejnišću Infotech je so 17lětny Tim Große rozhladował. Šuler Wojerowskeho Leóna Foucaultoweho gymnazija chce po maturje w IT-branši dale wuknyć.
Mnohe šansy w regionje
Wukubłanske městna na wšitkich hospodarskich polach
Šulerjo, kotřiž po 9., 10., 12. abo 13. lětniku šulu z wuswědčenjom wuchodźa, maja w Hornjej Łužicy mnohe šansy na powołanske wukubłanje. Na to pokazachu wukubłanske a studijne wiki Nawi přichoda zańdźenu sobotu w Budyskej powołanskej akademiji (BA). Tam zastupjene běchu předewzaća z najwšelakorišich branšow, mjez nimi wulke zawody kaž Bombardier. Patrick Sauer, kiž je tam něhdy sam wučomnik był, pytaše za stejnišći w Budyšinje a Zhorjelcu młodych ludźi. W sprjewinym měsće prašeja so předewšěm za mechatronikarjemi, kotřiž maja zawodne wukubłanje přez Industrijnu a wikowansku komoru w Drježdźanach. W Zhorjelcu trjebaja twarcow jězdźidłow a fachowcow za metalowu techniku. Ći maja wukubłanje direktnje na městnje, a to na tamnišej powołanskej šuli. „Chcemy, zo młodźi ludźo w regionje wostanu“, rjekny Patrick Sauer. Powěsć, zo njeje Němska železnica wozy, kotrež su w Budyšinje a Zhorjelcu twarili wotewzała, jeho hněwa. Wšako bě kritiku zbudźił zmylk software, za kotryž Budyscy a Zhorjelscy twarcy ničo njemóža.
Za hraće póćmje dobra zhromadnosć trěbna
Budyšin (SN/MiR). Do dźiwadła hić a hrajerjow na jewišću wobkedźbować je mnohim, tež dźěćom a młodostnym, samozrozumliwa naležnosć. Što pak, hdyž na jewišću žanych akterow njewidźiš, ale jeničce rekwizity? To je dźiwadło z ultrawioletnej swěcu (Schwarzlichttheater). Tajke dožiwichu wutoru šulerjo Budyskeho Philippa Melanchthonoweho gymnazija, Ewangelskeje zakładneje šule Huska a Budyskeje spěchowanskeje Lipoweje šule, jědnaće wučerjow a dalši hosćo na jewišću Kamjentneho domu. Pjeć wuknjacych 5. a 7. lětnika Melanchthonoweho gymnazija bě we wobłuku cyłodnjowskeho poskitka wšelake sceny nazwučowało.
„Sym so spočatk šulskeho lěta na gymnaziju prašała, hač móhła tam ze šulerjemi dźiwadło hrać. Pjećo, třo hólcy a dwě holcy, nětko sobu činja. A tak tydźensce jónu probujemy“, rozłožuje nawodnica poskitka Kristina Schormann, „šulerjo su pak tež paslili a eksperimentowali. Wšako měješe jich inscenacija powabna być.“ Tak su woni błyšćate kulki so čumpać a pisane pismiki po jewišću rejwać dali. W Budyskim Kamjentnym domje je Schormann dobreho partnera namakała.
