Konferenca z perspektiwu

póndźela, 27. junija 2016 spisane wot:

Regionalny zarjad Sakskeje kubłanskeje agentury Budyšin (SBAB) a Rěčny centrum WITAJ přihotujetej fachowu kubłansku­ konferencu, kotraž ma so 22. oktobra wotměć.

Budyšin (SN/MiR). Wosebje zaběrać chcedźa so z tym, kak ma so na polu wjacerěčneje wučby při wuwučowanju postupować. „Za to smy sej wěcywustojnych referentow přeprosyli, kotřiž njejsu Serbja“, rozłožuje zamołwity za serbske naležnosće pola SBAB Bosćij Handrik. „Mi a wšitkim druhim wobdźělenym je jasne, zo njeměła konferenca jónkrótna być. Chcemy přichodnje kóžde lěto tajku přewjesć a so na njej z načasnymi prašenjemi kubłanja rozestajeć.“

Wulět do Čěskeje

štwórtk, 23. junija 2016 spisane wot:
Chrósćicy/Liberec (SN/MiR). Šulerjo a wučerjo Chróšćanskeje zakładneje šule „Jurij Chěžka“ wulećachu sej dźensa do susodneje Čěskeje. „Dóstach přeprošenje z Liberecskeje techniskeje uniwersity“, rjekny šulski nawoda Měrko Šmit. Kubłanišćo, kotrež wuprawu ze swójskich srědkow płaći, chce nawjazać wuske styki do Łužicy a pyta hižo dlěje za partnerom. W Chróšćanskej šuli su prěnjeho tajkeho namakali. Za chowancow šule přihotowachu sobudźěłaćerjo uniwersity, wosebje docent David Krčmařík, wopyt uniwersity. Předstajić chcychu šulerjam slědźenski projekt, awtonomne jězdźidło, na kotrymž tam tuchwilu slědźa. Po tym su dźěći zhromadnje ze šulerjemi Liberecskeje zakładneje šule Jabloňova spěwali a rejowali. Zdobom wotměchu małe wubědźowanje w spěwanju serbskich a čěskich pěsnjow. Na kóncu podachu so šulerjo hišće do woblubowaneho IQ-parka. „Mam dotal jónkrótny projekt za jara spomóžny. Wšako maja naši šulerjo wot 2. lětnika tydźensce hodźinu čěšćiny. Nadźijam so, zo su jim dźensniše dožiwjenja pohon, čěšćinu zaměrnje dale wuknyć“, praješe Měrko Šmit do wotjězda.

Moderne ratarjenje w srjedźišću zajima

srjeda, 22. junija 2016 spisane wot:

Ralbičanska wyša šula wobdźěla so ­hižo wjele lět wuspěšnje jako UNESCO-kubłanišćo na wšelakich projektach mjezynarodneho kaž tež regionalneho wuznama.

Projekt w runje zakónčacym so šulskim lěće je so tomu wěnował, zbližić sej moderne ratarstwo w boju mjez hospodarskim wuspěchom a dołhodobnym zachowanjom přiměrjenych hospodarskich formow. W přihoće na teoretiske a wosebje praktiske stronki přewjedźenja projekta je sej Ralbičanska UNESCO-skupina pod nawodom wučerja Michała Wałdy hromadźe z Lipšćanskej UNESCO-šulu Paula Robesona nastajiła naročny plan. W nim měješe so nimo wičnych mechanizmow přepytować tež globalizacija wikowanja ze skótnej picu.

Ralley po sprjewinym měsće

srjeda, 22. junija 2016 spisane wot:

Budyšin (SN/MiR). Měšćanska rallye po Budyšinje je dźensa młodostnych chětro wužadała. Šulerjo 7. do 9. lětnika Serbskeje wyšeje šule „Dr. Marja Grólmusec“ Radwor podachu so dopołdnja do wšelakich kóncow sprjewineho města. Přičina jich přebytka krótko do zakónčenja šulskeho lěta je, wopominać Jurja Brězana składnostnje jeho stotych posmjertnych narodnin. Nadawk, z kotrymž so młodostni zaběrachu, bě, spřistupnić sej žiwjenje a skutkowanje najskutkownišeho serbskeho spisowaćela w druhej połojcy 20. lětstotka.

Čěšćinarjo za film myto dóstali

srjeda, 22. junija 2016 spisane wot:

Čěšćinarjo 8. lětnika Serbskeho gymnazija Budyšin su so lětsa na zwjazkowym wubědźowanju „Cuze rěče“ wobdźělili. Přewšo zbožowni nawróćichu so woni z mytowanja z 3. městnom.

30. meje 2016 běše skónčnje tak daloko: Po połdra lěće pilneho dźěła zhonichu šulerjo-čěšćinarjo 8. lětnika, zo su na mytowanje do Sakskeho krajneho sejma přeprošeni. Za wurisanje zapodali běchu woni swój film „Narodil se Kristus pán“ (Jězus je so narodźił). Myta přepoda šulerjam sakska ministerka za kubłanje Brunhild Kurth (CDU). 13 šulerjow bě so spočatk šulskeho lěta 2015/2016 rozsudźiło, so na zwjazkowym wubědźowanju cuzych rěčow w kategoriji „TEAM SCHULE“ wobdźělić. Nawod přewza Karoline Schreiter, a kóždy dósta swój nadawk a swoju rólu w scenariju. Projektej wěnowachmy jednu hodźinu tydźensce, tak zo běchmy hakle lětsa w januarje hotowi. Při tym jednaše so dospołnje wo šulerski projekt: Šulerjo wumyslichu sej sami dialogi a jednanje, Darius a Jacob staj wšitko z fotokameru natočiłoj a Jacob je cyły film zestajał. Wliw wučerki wobmjezowaše so na rěčne korektury dialogow, kotrež běchu wězo­ w čěšćinje.

„Šwintuchaj“ pola Smolerjec byłoj

srjeda, 22. junija 2016 spisane wot:
16 šulerjow 5. lětnika Serbskeje wyšeje šule „Michał Hórnik“ Worklecy je wčera Budysku­ Smolerjec kniharnju wopytało. Dźiwadźelnica Hanka Rjelcyna (srjedźa) čitaše­ jim dyrdomdeje dweju hólcow z knihi „Šwintuchaj“ a předhra tež někotre wurězki­ z noweje słuchoknihi. Foto: SN/Maćij Bulank

Wojerecy (SN/MiR). Šulerjo Wojerowskeje zakładneje šule „Handrij Zejler“ při Worjole běchu wčera dopołdnja wosebje wćipni a napjeći. Wšako běchu woni publikum zarjadowanja zahajaceho so lětušeho Swjedźenja serbskeje poezije. 4. lětnik Chróšćanskeje zakładneje šule „Jurij Chěžka“ wuhotowa za nich program na česć Jana Arnošta Smolerja. Přewažnje w němskej rěči rozłoži jim wučerka Wórša­ Wićazowa skutkowanje Smolerja na dobro Serbow, předewšěm tež dźěći. Program dožiwichu šulerjo dwurěčny. Wšako bě Smoler wjetšinu swojich pěsničkow a powědančkow serbsce a němsce w zběrce „Pěsnički hornich a delnich Łužiskich Serbow“ wozjewił.

Wosebje zabawjacy a informatiwny wopokaza so tež wustup Tomasza Nawki. Ze swojim přispomnjenjom „Sym dudak Tomasz z Budyšina“ a ze swojimi instrumentami, trojimi dudami a małymi serbskimi husličkami, zdoby sej wón wulku sympatiju dźěći, jich wučerkow a młodych interpretow Smolerjowych pěsničkow a powědkow.

Nazhonjenja staršich z praksy wužić

wutora, 21. junija 2016 spisane wot:

Štož staršich do angažementa za přichod sakskich šulow ćěri, je starosć wo swoje dźěći. Tole nazhonichu zapósłancy Sakskeho krajneho sejma Patricia Wissel, Lothar Bienst a Marko Šiman (wšitcy CDU) wčera wječor we Wulkich Ždźarach.

„Dźiće do swěta, dokal so wam chce“

póndźela, 20. junija 2016 spisane wot:

„Wurjadny lětnik maturantow“, w tym běchu sej přitomni přezjedni, je swoje wuswědčenja zrałosće dóstał. Tež swjatočnosć sobotu na žurli Serbskeho gymnazija Budyšin bě wurjadna.

Budyšin (SN/at). Za swójbu so rozsudźić, maćeršćinu dale dać a přećelstwa ze šulskeho časa zachować – tele tři poručenja je swjedźenski rěčnik Danko Handrik lětušim maturantam Serbskeho gymnazija za nowy žiwjenski wotrězk sobu na puć dał. 36 dotalnych gymnaziastow bě sej jeho přeprosyło, zo bychu z jeho słowow nastorki za swójske wuwiće dóstali. Tajke zwurazni tež nawoda najwyšeho serbskeho kubłanišća René Wjacławk, dopominacy na ideale Jakuba Barta-Ćišinskeho. Wjacławk zmóžni zaćišć wo „wurjadnym lětniku“ a zhladowaše hromadźe z maturantami, jich staršimi a přiwuznymi na wjerški jich wosomlětneho přebywanja na gymnaziju, doniž swjatočnje zdrasćenych młodych ludźi njenamołwi: „Dźiće do swěta, dźiće, dokal so wam chce, rozhladujće so, rěčće we wšelakich rěčach.“

Slepo (AK/SN). „Wutrobu pytać“ rěka ­wustajeńca, kotraž je wot minjeneho ­tydźenja w Slepjanskej wyšej šuli „Dr. Marja Grólmusec“ widźeć. W njej pokazuja najwšelakorišu domjacu nadobu, kotraž so dźensa lědma wužiwa, kaž zuwak (škórnjow), truhak (při swinjorězanju) a tak mjenowany howjazy jazyk k zapřehnjenju kruwow. Přehladka je wuslědk projekta 23 šulerjow 9. lětnika. Cyły tydźeń zaběrachu so woni kónc meje­ w Slepjanskej wosadźe z domiznu a identitu­.

nawěšk

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson

nowostki LND