W Smječkecach móža tři młode swójby swójski dom twarić
Smječkecy (SN/MWj). Štož je w druhich komunach zdźěla problematiske, dźe we Worklečanskej gmejnje po zdaću lochce wot ruki. Znajmjeńša skićeja tam młodym swójbam stajnje znowa składnosć, sej swójski dom natwarić. Po ležownosćach při Worklečanskim kupowym haće a dalšich při tamnišim Kozarčanskim puću změja nětko tři nowe twarske ležownosće w Smječkecach, a to nic něhdźe schowane we wsy, ale z krasnym wuhladom z Winicy do łužiskeho kraja do směra na Worklecy a Chrósćicy. Na swojim zašłym posedźenju su Worklečansy gmejnscy radźićeljo wotpowědne wustawki wobzamknyli a je zjawnje wupołožili.