Łuh (ML/SN). 24 króć móžachu so zajimcy wčera na wodźenju po historiskim wětrniku na kózłach z lěta 1733 na hórce Łóžko mjez Łuhom a Chasowom wobdźělić. Mjez druhim wodźeštaj jich Njeswačanski wjesnjanosta Gerd Schuster (CDU) a zamołwita za turizm gmejnskeho zarjada Kathleen Barthen jako młynk a młynska po techniskim pomniku. Při tym zhonichu wopytowarjo tójšto zajimaweho wo tym, kak běchu tam něhdy žito mlěli, kak ćežke bě dźěło wětrnika a žiwjenje młynka a jeho swójby, a móžachu sej młyńcu wobhladać.

Na wčerawšim 22. němskim dnju młynow běchu sobudźěłaćerjo Njeswačanskeho gmejnskeho zarjada zaso wokřewjacy swjedźeń za młodych a starych kołowokoło bywšeho Zarěčanskeho wětrnika wuhotowali, kotryž dósta 1978 na Łóžku swoje nowe městno. Kapała Hornjokrajni muzikanća zapiska tam wčera lóštne štučki a zaruči tak znowa, kaž hižo wot lěta 2003, dobru naladu. Dźěći so na łuce zabawjachu a Łuhowski klub Wittinghoff staraše so wo ćělne derjeměće wopyto­warjow.