Prěni geodetiski referencny dypk Budyskeho wokrjesa přepodaty
Budyšin (SN/MWj). Štóž ze swojim smartphonom jenož telefonuje, jón najskerje njetrjeba. Wužiwarjo smartphona z jeho njeličomnymi funkcijemi so tuž zawěsće wjesela, zo ma Budyski wokrjes wot wčerawšeho swój prěni geodetiski referencny dypk za GPS. Na jeho wotkryće staj tohorunja krajny rada Michael Harig a wyši měšćanosta Christian Schramm (wobaj CDU) přišłoj.
„Čwak žiwjenskeje woprawdźitosće“ mjenowaše Harig tónle dypk, na kotrymž móžeš přepruwować, kak derje smartphone funguje a hač nawigaciski nastroj ći na dwaj metraj dokładnje pokazuje, hdźe runje sy. Referencny dypk namakaš, hdyž z Němsko-Serbskeho ludoweho dźiwadła do směra na agenturu za dźěło běžiš a po schodach dele k Wonkownej Lawskej doběhnješ. Na muri při schodach je připrawjena tafla, z dokładnymi koordinatami woneho dypka. Połožiš-li smartphone na woznamjenjeny dypk, móžeš z darmotnej app zwěsćić, hač ći aparaćik akuratnje samsne koordinaty pokazuje, kaž su wone na tafli napisane, abo hač so wone wot nich tola trochu wotchileja.
