Wojerecy (AK/SN). Z modernej techniku, z kotrejž lampy krok po kroku słabšo swěća, chce město Wojerecy přichodnje při nadróžnym wobswětlenju 40 procentow swojich wudawkow za milinu lutować. Tuchwilu wudawaja za to lětnje 300 000 eurow. „Wot junija hač do septembra chcemy wšitke 4 000 lampow na modernu wosłabjensku techniku přetwarić. W bydlenskim kompleksu 2 instalujemy nimo toho 55 nowych LED-lampow“, podšmórnje jednaćel Wojerowskeje energiju produkowaceje towaršnosće (EEH) dr. Thomas Schmidt.
Nowu techniku maja domjace firmy instalować. EEH inwestuje za to něhdźe 780 000 eurow. Pozadk přetwara je zrěčenje z městom, kotrež ma zaměr, z nadróžnymi lampami lětnje 700 000 kilowattowych hodźin zalutować. „To woznamjenja 358 tonow mjenje wuhlikoweho dioksida wob lěto“, rozłožuje Thomas Schmidt.