Njeswačidło (ML/SN). Swójba Marko z Łuha wobhospodarja wot 1. meje lodowu kofejownju „Oranžerija“ w bywšim kuchinskim pawiljonje Njeswačanskeho parka, kotruž bě něhdyša wotnajerka loni zawrěła. Hižo prěni dźeń kaž tež minjene kóncy tydźenja, na Bože spěće a swjatki knježeše wulki nawal hosći zbliska a zdaloka. Wosebje Drježdźanjenjo rady po kolesowanju po krajinje hole a hatow kaž tež druzy wulětnikarjo po wuchodźowanju po Njeswačanskim parku w baroknym a jendźelskim krajnym stilu, po wopyće Stareho hrodu z lěta 1723 z małej galeriju abo po wobhladanju wjesneho muzeja do kofejownje załožeja.
W pawiljonje napřećo přirodoškitnej staciji je nimo rumnosćow stawnistwa a turistiskeje informacije znowa wuhotowana lodowa kofejownja. Při přijomnym wjedrje wšak hosćo tež rady za blidami před njej a pod štomami parka sedźa. W nadawku wójwody Friedricha Ludwiga Württembergskeje twarjeny pawiljon bu něhdy z keramiskimi kachlemi tepjeny, a eksotiske rostliny w nim přezymowachu. Tohodla je najenk Steffen Marko kofejownju „Oranžerija“ pomjenował.
