Budyšin (SN/at). Nowy Budyski wyši měšćanosta je Alexander Ahrens. 49lětny zhromadny kandidat Budyskeho wobydlerskeho zwjazkarstwa (BBBz), Lěwicy a SPD je wčerawše rozsudne wólby z 48,1 procentom njewočakowano jasnje dobył. Matthias Knaak (CDU, 35,6%) njeje do njeho sadźenu nadźiju spjelnić móhł. Třeći na wólbnym lisćiku Mike Hauschild njeje ze 16,6 procentam swój wuslědk z prěnjeho koła cyle wospjetował. Wólbne wobdźělenje 38,6 procentow bě wo pjeć procentow słabše hač při wólbach 7. junija.
Wot 18 hodź. staj Ahrens a Hauschild hromadźe ze swojimi podpěrarjemi w foyeru radnicy dochadźace wuslědki sćěhowałoj. Hižo te z prěnich wólbnych lokalow widźachu Alexandera Ahrensa prědku. Na kóncu doby wón w 26 z 30 wólbnych wobwodow, Matthias Knaak w štyrjoch. Krótko do sedmich přińdźe tež wón do foyera a dobyćerjej gratulowaše.
„Moja wospjetna kandidatura bě na kóždy pad prawa. Sym tež podźěl hłosow nimale dźeržał“, rjekny Mike Hauschild. „Přiznawam swoju poražku“, běchu słowa přesłapjeneho Matthiasa Knaaka, „z pozběhnjenej hłowu pak budu w měšćanskej radźe z nowym wyšim měšćanostu dźěłać.“