Čorny Chołmc (KD/SN). Njewšědny jubilej 100. narodnin móžeše tele dny w Čornym Chołmcu Ilsa Pěčikowa swjećić. Hromadźe ze swojim mjeztym zemrětym mandźelskim bě wona poslednja młynkowa Čornochołmčanskeho młyna.
Jubilarka bě so 1915 w Šćeńcy narodźiła a so tam jako młoda žona wudała. Muž pak w Druhej swětowej wójnje padny, powěda jeje wnučka Katrin Schürch. Přewzawši w Čornym Chołmcu žiwidłowy wobchod zezna wudowa Serba Pawoła Pěčika a jeho syna Siegfrieda. 1946 so Ilsa z Pawołom zmandźeli a přiwza Siegfrieda jako swoje dźěćo. Siegfried Pěčik chodźeše na tehdyšu Budysku Serbsku wyšu šulu. Hač do lěta 1974 staj jeho staršej Čornochołmčanski młyn wuspěšnje wjedłoj. 1972 pak z njeho na statny přikaz mlějidło wutwarichu, tak zo móžachu wot toho časa žito jenož hišće šrótować, Katrin Schürch rozjasnja. Tak skónči so hospodarska samostatnosć mandźelskeju, kotrajž pak běštaj tehdy hižo nimale w rentnarskej starobje. Hač do spočatka 80tych lět dźěłaše Ilsa Pěčikowa hišće w burskim wikowanskim drustwje BHG.
