Budyšin ma noweho financneho měšćanostu. Z přemóžacej wjetšinu je rada města wčera na wurjadnym posedźenju dr. Roberta Böhmera do zastojnstwa wuzwoliła. 43lětny rodźeny Budyšan naslěduje w zastojnstwje swojeho nana Michaela Böhmera (CDU).
Budyšin (SN/JaW). Wčerawše wurjadne posedźenje Budyskeje měšćanskeje rady, kotrež nawjedowaše posledni raz dotalny wyši měšćanosta Christian Schramm (CDU), njebě jenož wobydlerjam Budyšina, ale tež sobudźěłaćerjam měšćanskeho zarjadnistwa wulce zajimawe. Wšako chcychu runje woni z prěnjeje ruki wědźeć, štó budźe wotrjad hospodarstwo, financy, kubłanje a socialne a zdobom tam přistajenych přichodnje nawjedować. Mjez přitomnymi bě tež designowany Budyski wyši měšćanosta Alexander Ahrens. Bjez dźiwa tuž, zo městna za hosći na žurli měšćanskeje rady lědma dosahachu. Dweju kandidatow za zastojnstwo běchu zastupjerjo wšitkich frakcijow we hłownym wuběrku města z cyłkownje 35 požadarjow wuzwolili.
