Nimo cyrkwjow su tež farske domy něme swědki stawiznow. Ze swojej lětnjej seriju so po serbskich a dwurěčnych katolskich a ewangelskich wosadach rozhladujemy a předstajimy někotre fary – dźensa Njebjelčansku.
Hižo wokoło lěta 1342 steješe w Njebjelčicach na městnje dźensnišeho kěrchowa cyrkwička, poswjećena swjatemu Měrćinej. Hač do reformacije starachu so tam wo Bože mšě a dalše słužby mniša 1294 załoženeho Kamjenskeho klóštra franciskanow. Mjeztym zo bu město Kamjenc dospołnje ewangelske, wostachu Njebjelčicy katolske. Za čas fararja Handrija Mróza so drjewjana cyrkwička 1739 wotpali. W lětach 1741 do 1743 natwarichu nowu wulku cyrkej na hórce w baroknym stilu. Twar Božeho domu podpěrowaše tehdy klóšter Marijina hwězda, kotryž měješe patronat nad wosadu. Wopony klóštra we a zwonka cyrkwje kaž tež na farskim domje z lětoličbu 1798 na to skedźbnjeja.