Jasčenjo swój 650. jubilej na sportnišću swjećili
Jaseńca (SN/mwe). Kónc tydźenja swjećeše Jaseńca 650lětne wobstaće. K tomu je něhdźe 50 čłonow wopřijace towarstwo Bjesada z mnohimi pomocnikami wot pjatka do njedźele na sportnišću wjesny swjedźeń wuhotowało. Hižo pjatk wječor knježeše tam krasna nalada, jako hraješe při horcym wjedrje w chłódku pod štomami kapała Fünf an der Feier. Nimo hercow Carstena Šnajdra z Worklec (akordeon), Heika Mittaga z Róžanta (cajon), Petera Michlera (klarineta, tenorsaksofon) ze Strawaldy a Gernota Schweitzera z Worklec (gitara) bě to tež z Jaseńcy pochadźacy Jan Hórnik (kontrabas), kiž ze swójbu w Měrkowje bydli. Bjez zwukoweje techniki su mužojo publikum z lóštnymi swingowymi melodijemi, z kubaskimi, portugalskimi a grjekskimi rytmami kaž tež ze serbskimi štučkami k sobuplacanju wabili a zahorili.