Budyšin (SN/mwe). Jednaćel Budyskeho Kamjentneho domu Torsten Wiegel je přesłapjeny, zo njeje na mjezynarodnym projekće M(US)IKROSKOP nimo nawody spěwneho wobłuka Istvana Kobjele ani jenički serbski młody hudźbnik abo spěwar wobdźěleny. Hač do pjatka dwutydźenska lětnja hudźbna dźěłarnička traje. Wšitcy so hižo na zakónčacy koncert pjatk, 24. pražnika, na žurli sociokulturneho centruma w Budyšinje a dźeń pozdźišo w pólskej Jelenjej Górje wjesela.
Po tym zo běchu wobdźělnicy workshopa z Budyskeho regiona a Jelenjeje Góry folklorny festiwal w Chrósćicach wopytali, dachu so do dźěła. Tak nasta 15 zajimawych swójskich kompozicijow na zakładźe ludoweje hudźby. Nimo spěwarkow přednjesu je hudźbnicy na dujerskich instrumentach, wiolinje, keyboardźe, ukuleli, gitarje, mandolinje a na najwšelakorišich bijadłach.
