Skupina staršich z Pěskec je so wuspěšnje na hrajkanišćowej iniciatiwje napojoweho producenta Fanta wobdźěliła. Cyły julij móžachu sympatizanća za jedne z 353 hrajkanišćow po wšej Němskej internetnje wothłosować. Nětko je jasne, zo wobsadźichu Pěskečenjo 64. městno, za čož kiwa jim myto tysac eurow. Marian Wjeńka je so wo tym ze sobuiniciatortku Christinu Šwejdźinej rozmołwjał.
Wutrobnu gratulaciju najprjedy raz za dobre wotrěznjenje! Kak sće powěsć přiwzali, zo bu 2 067 hłosow za waše hrajkanišćo wotedatych?
Ch. Šwejdźina: Dźakuju so za gratulaciju. Smy jara zbožowni, zo smy 64. městno docpěli. Nětko so wězo tež na tysac eurow wjeselimy, zo móžemy z tutymi pjenjezami nastroj za mjeńše dźěći kupić.
Maće mjeztym hižo konkretny nastroj we wočomaj?
Ch. Šwejdźina: Naš wotpohlad je, za mjeńše dźěći čumpace zwěrjo na wulkim pjeru wobstarać abo čumpjel, na kotrejž so kaž we wulkim plećenym hnězdźe čumpaš. Rozsudne na kóncu budźe, kelko nastrojej płaćitej. Konkretnje chcemy so po dowolowym času z tym zaběrać a so potom za jednu abo tamnu wariantu rozsudźić.