Lessingowe město wotměje swój 170. wulki swjedźeń
Kamjenc (SN/MWj). Wot 21. do 27. awgusta 2015 wotměje město Kamjenc swój tradicionalny šulski a domizniski swjedźeń Boršć, lětsa hižo 170. raz. Nětko tónle podawk z połnej paru přihotuja. Nimo kóždolětneho programa maja stajnje tež nowosće, kaž dźensa na nowinarskej rozmołwje přeradźichu.
Lětuši swjedźeń steji w znamjenju měšćanskich partnerstwow, a to 50 lět z čěskim Kolínom, 25 lět z rynskohessenskim Alzeyjom a dźesać lět z pólskim Karpaczom. Tak wotewru 23. awgusta w 9.30 hodź. w měšćanskim dźiwadle a na dworje radnicy wustajeńcu z twórbami štyrjoch wuměłcow z Kolína. Nimo toho je hišće hač do 13. septembra w měšćanskej informaciji fotowa přehladka wo partnerstwje z čěskim městom widźeć.
Kamjensku Boršć zahaja pjatk, 21. awgusta, w 19.30 hodź. z koncertom dujerskeho orchestra Lessingoweho města zhromadnje z tym z Kolína na torhošću. Nowy je lětsa samsny wječor wustup woblubowaneje nižozemskeje dujerskeje kapały Sputterkearls.
