Ludźo wužiwaja wšelake móžnosće, horce hodźiny na dźěle derje přetrać

Worklecy/Radwor (SN/MiR/JK). Po cyłej Łužicy knježi tuchwilu wjedro kaž w horcych dowolowych kónčinach na juhu Europy­. To wužaduje wosebje tych, kotřiž nimaja prózdniny a dyrbja tuchwilu w běrowach sydać, runje tak kaž dźěłaćerjow w produkciji. Dźensa knježa temperatury samo hač do 40 stopnjow celsija. Hakle jutře a njedźelu wěšća wjedrarjo trochu wochłódnjenja.

Tež hdyž sej tón abo tamny mysli, zo maja přistajeni w swojich běrowach klimatisku připrawu, tomu wšudźe tak njeje. Nazhonići sobudźěłaćerjo pak wědźa sej pomhać. Michaelis Korjeńkowa z Rěčneho centruma WITAJ w Budyšinje so sčasom wo to stara, zo nima přećopły běrow. Wšako rano wokno šěroko wočini. Hakle po připołdnju so tam słónco staja a to wona wokno zaso ze žaluziju škita. „Najlěpje wšak pomha so swojim nadawkam wěnować. To na ćopłotu zabudźeš“, sekretarka RCW měni.