Hižo štyri tydźenje su prózdniny a něchtóžkuli bě mjeztym w dowolu. Wo tym swědča tež dowolowe fota našich čitarjow, kotrež do redakcije dochadźeja. Tak pobyštej Rubinec Djamila a Jan z Erfurta z dźědom a wowku z Noweje Wsy pola Njeswačidła z ćahom w Liberecu. Tam podachu so zhromadnje na horu Ještěd z jeje markantnej telewizijnej wěžu. Wulke dožiwjenje bě hižo jězba z liftom na wjeršk, zwotkelž skićeše so krasny wuhlad. Zajimawa bě tohorunja wustajeńca gigantow w Liberecskej coologiskej zahrodźe (deleka), piše wowka Lucija Rubinowa.
Cyle hinaši bě dowolowy přebytk Janiki Bětnarjec z Budyšina. Wona bě njedawno pola dobreje přećelki w Hrubjelčicach. We wisatej maće je sej mała Sophie spěšnje wusnyła (pódla). „Takle móžeš sej žiwjenje lubić dać“, naša čitarka k tomu komentuje.