Předewšěm staršim mjeńšich dźěći su w prózdninach motiwy swojich pjerachow najrjeńše dowolowe wobrazy. Wo tym swědčitej dopisaj, kotrejž stej tele dny do redakcije dóšłoj. Tak poby Christine Kurinkec z Isserody ze swójbu w Berchtesgadenskich horach, hdźež mějachu wulkotne móžnosće pućowanja. Na jednym z nich wuhladachu při lifće wabjensku taflu za zymski dowol z pokazku na sankowansku čaru. To sej šěsćlětna Anna dwójce kazać njeda a so na sanki sydny. Čujo so kaž w zymje ju hnydom „huškaše“, štož je nětko rjana dopomnjenka na dowolowu jězbu.

Nic zymsku kulisu, ale lětnje wjedro při morju mějachu Škodźicy z Kukowa a Lukašecy z Worklec při zhromadnym dowolu na kupje Usedom. Najwjetše wjeselo w pěsku měještaj najmjeńšej dowolnikaj Filip Lukaš a Beno Škoda. „Dokelž je so jimaj tak jara lubiło, je tónle wobraz naš faworit“, pisa nan Clemens Škoda.