Budyšin/Chrósćicy (SN/at). Přiroda a tež ludźo wodychnu. Po tři tydźenje trajacej horcoće z temperaturami blisko 40 stopnjow je wot póndźele dešć Hornju Łužicu wožiwił. „Dožiwjachmy centralne přestajenje wjedra. Temperatura je wo nimale 20 stopnjow spadnyła“, zdźěli Rolf Kubenz z Budyskeje wjedrarnje Zeleneje ligi Hornja Łužica z.t.

„Za wčerawši dźeń sym dźensa rano 45 litrow dešća na kwadratny meter naměrił, wčera rano bě to 20 litrow“, rozprawja Chróšćan Pawoł Kmjeć. W lěće 1974 je jeho nan započał, dešć měrić a mnóstwo do knižki zapisować. Tele dźěło dale wjesć, to je Pawołej Kmjećej zawjazk. Dobu lětnjeje suchoty móže wón akuratnje pomjenować: „To bě wot 26. julija hač do 15. awgusta.“ Lětsa je so w Chrósćicach dotal 412 litrow dešća na kwadratny meter našło. Po swójbnych zapisowanjach zda so to Pawołej Kmjećej hišće normalne być, wšako wučinja lětne mnóstwo 600 do 700 litrow. Kmjećec rekordny zapisk 96 litrow poćahuje so na wulke njewjedro 20. awgusta 2012.