Za natwar wohnjowoborneho depota w Hornim Wujězdźe je Porchowska gmejna něhdźe 295 000 eurow nałožiła. Sakska jón ze 100 000 eurami spěchowaše. Nětko je gratownja dotwarjena.

Horni Wuježd (SN/mwe). „Dyrbimy naše wohnjowe wobory derje wuhotować, wosebje kameradow w Hornim Wujězdźe. Woni maja při wobchadnych njezbožach blisko awtodróhoweje wotbóčki sobu najwjace zasadźenjow“, Porchowski wjesnjanosta Sebastian Hein (CDU ) rjekny. Z teje přičiny je komuna za Hornjowujězdźanow dołho požadane nowe hašenske jězdźidło typa HLF 10 skazała.