Rowno (JoS/SN). Zwotkel pochadźeja běrny? To chcychu minjenu wutoru dźěći Witaj-pěstowarnje „Milenka“ z Rownoho na tamnišim Njepilic statoku zhonić.
Čerwjene běrny družiny „Laura“, kotrež tam žnějachu, přińdźechu wězo ze zemje. Rownjanske žony w serbskej dźěłanskej drasće běchu najrjeńše běrny wukopali. Někotre z nich dźěćom hnydom na statoku zwarichu a k tomu dóstachu twaroh z cyblu a lanym wolijom. Wukopowanje běrnow bě projekt za serbske dźěći Rownoho. „Lětsa smy na našim pólku běrny tykali a len wusyli. Za třipólne hospodarstwo, kaž je naše prjedownicy praktikowachu, njebě ruma dosć“, rjekny předsyda Towarstwa Njepilic dwór Manfred Nikel.
Ze swojim projektom chcedźa čłonojo towarstwa pod hesłom „Kak jo to bylo?“ najmjeńšim pokazać, zwotkel běrny scyła přińdu a kelko prócy běše trjeba, je z motyku wukopować. Dźensa wšak běrny z mašinami žněja. Cyłkownje nažnjachu na małym pólku Njepilic statoka tři centnarje běrnow a pjelnjachu je ke składowanju na statoku do měchow.