Za bywši kwartěr w Čelchowje žane twarske prawo
Wulka Dubrawa (CK/SN). Zo móhł Budyski wokrjes ćěkancow zaměstnić, chce jemu Wulkodubrawska gmejna dwě bydleni poskićić, jedne z njeju w bywšim wjesnym ambulatoriju. Tole připowědźi wjesnjanosta Lutz Mörbe (njestronjan) na zašłym posedźenju gmejnskeje rady. Komuna bě njedawno list krajneho rady Michaela Hariga (CDU) dóstała, po kotrymž je wona zakonsce winowata ćěkancow přiwzać. Kaž wjesnjanosta dale zdźěli, zajimowaše so wokrjes za objekt w Čelchowje. Po dokładnym pruwowanju pak so toho nětko tola wzdadźa, dokelž za imobiliju, kotraž je hižo wjacore lěta prózdna, žane twarske prawo njewobsteji.