Hižo časćišo je so Njebjelčanska gmejna z najwšelakorišimi projektami na wubědźowanjach wobdźěliła a nic jenož jónu jedne z prěnich městnow wobsadźiła. Zawčerawšim bě znowa wubědźowanska jury we wsy.
Njebjelčicy (HS/SN). We wobłuku wubědźowanja sakskeho ministerstwa za wobswět a ratarstwo „Twarić na wsy“ je sej zawčerawšim komisija fachowcow pod nawodom prof. Thomasa Willa z Drježdźanskeje techniskeje uniwersity Njebjelčansku pěstowarnju „Jan Skala“ wobhladała. W štyrjoch kategorijach, jedna z nich je nowo- a přetwar, chcedźa kónc lěta stajnje tři projekty mytować. Kriterije su mjez druhim architektoniska kwalita, poćah k regionalnemu twarjenju, energijowa eficienca a ekologiske aspekty.