Dokelž za něšto dnjow hižo nazyma wo durje kłapa, skónčimy dźensa lětušu akciju, z kotrejž pytachmy za najrjeńšim dowolowym wobrazom swojich čitarjow. Redakciska jury je sej hišće raz wšitke zapósłane fota wobhladała a so za motiw z dźěćimi w improwizowanym „poolu“ jako najrjeńši rozsudźiła. Awtorce Grit Wićazowej z Budyšina přewostajimy tuž swójbny zastupny lisćik za wopyt Małowjelkowskeho prazwěrjenca.
Druhe myto spožčimy Juliji Wćelichowej z Koslowa za wobraz wo samopaslenej skakanskej wěži, z kotrejž mějachu młodostni při kupanju w Hórčanskej skale swoje wjeselo. Jej připósćelemy w Ludowym nakładnistwje Domowina wušłu knihu Gerata Wornarja „Ze žohnowanjom na puć“.