Referent wyšeho měšćanosty wo perspektiwach wuwića rěčał
Budyšin (CS/SN). Hladajo na demografiske wuwiće wuchodnej Sakskej žadyn dobry přichod njekiwa. Tuchwilne prognozy z toho wuchadźeja, zo zhubitej Budyski a Zhorjelski wokrjes hač do lěta 2025 něhdźe 60 000 wobydlerjow. Tole rjekny Wolfgang Zettwitz póndźelu w přednošku čłonam towarstwa Haus & Grund. Přistajeny w Budyskim měšćanskim zarjadnistwje za strategiske wuwićowe planowanje njewobkedźbuje při tym móžny wliw ličby ćěkancow. W njej njewidźi tuchwilu ani wohroženje ani šansu. Za alarmowacy pak ma wón fakt, zo předewšěm młode a derje wukubłane žony region wopušćeja, zo podźěl staršich přiběra a zo je kwota bjezdźěłnosće z 11,1 procentom poměrnje wysoka.