Budyšin (CS/SN). Lětuši dźeń wotewrjenych duri Budyskeho Němsko-Serbskeho ludoweho dźiwadła je so minjenu njedźelu wuwzaćnje hromadźe z dnjom wotewrjeneho pomnika wotměł. Rietschelowe swisle w Dźiwadle na hrodźe wšak běchu stajnje hižo wobstatk pomnikoweho dnja. Tak su tónraz woboje zwjazali. Poskitk, sej Dźiwadło na hrodźe wot pincy hač pod třěchu zbližić a při tym 72 programowych dypkow dožiwić, wopytowarjo w bohatej ličbje přiwzachu. Na kóncu dnja zličichu tam 3 500 zajimcow.

Dźiwadłowa kapała Floppy dolls sedźeše praktisce hižo na spakowanych wa­čokach. Wona wotjědźe přichodne dny do texaskeho Serbina na Wendish Fest. To so tež njedźelu wotbłyšćowaše, jako hraješe před kulisu saloonowych durjow z napisom Serbin–Texas. Program serbskich hudźbnikow rěkaše tuž wotpo­wědnje „It’s trendish to be wendish“.