Nawodnistwu Budyskeje radnicy přisłuša přichodnych sydom lět žona. Z wulkej wjetšinu je měšćanska rada Julianu Naumann za twarsku měšćanostku woliła. 39lětna je we Wismarje a Weimaru architekturu a europsku urbanistiku studowała. Wona skutkowaše pola nošerjow saněrowanskich naprawow w Němskej, Francoskej a Jendźelskej a ma wulke nazhonjenja při wuwiću bydlenskich štwórćow. Z modernymi bydlenjemi chce wona Budyšin za młode swójby atraktiwniši sčinić, žiwe stare město zachować a při twarskich předewzaćach wobydlerstwo sčasom zapřijeć. „Wosebity charme Budyšina je, zo su ludźo tule blišo při wěcy“, wona rjekny.
Juliane Naumann nastupi w decembru naslědnistwo Petera Hessy, kiž njeje hižo kandidował. Jako twarska měšćanostka budźe wona zamołwita za wysoko- a hłubokotwarski zarjad z wobłukami měšćanske planowanje, twarske dohladowanje a měšćanskotwarske spěchowanje. W předewzaćach a zaměrowych zwjazkach pak njebudźe wona sprjewine město hižo zastupować. Tónle nadawk přewozmje wyši měšćanosta.