Nazymski spektakl wułójenja rybow dožiwichu mnozy wćipni minjenu njedźelu w Złyčinje. Tajke karpy, kajkež z Ballackec hata wułójichu, w druhich kónčinach podarmo pytaja.
Złyčin (JoS/SN). Najebać to, zo njeje so słónčko tónraz tak prawje wudrapało, přichwatachu wopytowarjo zbliska a zdaloka na rybarski swjedźeń při wulkim Ballackec haće do Złyčina. Na kóždolětnym wułójenju rybow knježi tam nalada kaž na ludowym swjedźenju.
Hatar Karsten Ringpfeil stara so kóžde lěto wo poradźenje swjedźenja. Cyły retomas sušeneje a čerstweje ryby wšelakich družin ze swójskich hatow tam zaso předawachu. Hłód tradać tež nichtó njetrjebaše. Rybjacu poliwku, rybičkowe całty, karpowy ryž, grilowane pstruhi, pražene kulki ze šćuki a rybjace pražene kołbaski słodźachu młodym kaž staršim ludźom. Žony z wokolnych wsow běchu tykancy napjekli, kotrež wosebje z nazymskimi płodami kaž slowkami, jabłukami a krušwami pokładźechu.
