Tradiciju pokładźenja kermušnych tykancow pola pjekarja hišće haja
Wotrow (bl/SN). Je rano zahe, wjetšina leži hišće w borlešku a měrnje spi. We Wotrowskej Bulankec pjekarni pak so hižo dźěła. Čas kermušow tu je. Tam maja tuž nětkole ruce połnej dźěła. Mnozy skazaja sej pola pjekarja słódny kermušny tykanc. Typiske droždźowe blachowe tykancy kaž twarohowy tykanc, čorny a běły štrajsl, makowy abo tež mandlowy nětko za čas kermušow we wjetšich mnóstwach pjeku. Znata Wotrowska hribikaca torta abo torta z krušwow a marcipanom stej nimo blachoweho tykanca najwoblubowanišej. Kupcy ze wšitkich kónčin serbskorěčneje Łužicy dojědu sej do Wotrowa.
Starodawna tradicija pokładźenja tykancow pola pjekarja ke kermuši so hišće zhubiła njeje, hačrunjež je ličba žonow wočiwidnje spadnyła. Loni přichwatachu hišće tři žony, lětsa ani jenička.