Pytaš-li w interneće za informacijemi wo Pančicach-Kukowje, namakaš pod wikipediju tež rubriku „wosobiny“. Tu steja po rjedźe Jakub Bart-Ćišinski, Mikławš Andricki a – na třećim městnje – Alexander Reiner, hišće před tučasnym sakskim ministerskim prezidentom Stanisławom Tilichom.

Informacije wo Alexanderu Reineru njenamakamy w žanym biografiskim słowniku. Najskerje je lědma někomu znaty. Krótka rešerša wunjese pak chětro dwělomne fakty, kotrež njedowoleja poprawom pomjenowanje jako „wosobina“.

Alexander Reiner narodźi so 4. měrca 1885 w Pančicach jako syn klóšterskeho sekretara Adolfa Aleksandra Reinera a jeho mandźelskeje Christiny rodźeneje Loisker. Po abiturje studowaše wón zubnu medicinu a promowowaše na Lipšćanskej uniwersiće. 1912 dósta aprobaciju jako zubny lěkar. W časopisu Katolski Posoł, lětnik 1914, poruča na přikład w nawěškach wospjet swoje posłužby jako „zubjacy lěkar“ z přidawkom „rěču serbski“.