Wulke Ždźary (AK/SN). Gmejna Łaz prócuje so dale zaměrnje wo trajne, fairne a přihódne rozrisanje w naležnosći rjedźenja wopłóčkow w Koblicach a Wulkich Ždźarach. Tole podšmórny wjesnjanosta Udo Wićaz (CDU) na wobydlerskej zhromadźiznje. Wjac hač 200 zajimcow bě na nju do awle zakładneje šule Při Hórnikečanskim jězorje přišło. Facit dlěšeje diskusije bě: Z pomocu pisomneho naprašowanja měło wšitkich cyłkownje 620 so přizamkowacych rozsudźić, kotru wariantu faworizuja. Hač do jutřišeho maja wobydlerjo naprašnik gmejny dóstać, hač do 3. nowembra měli na njón wotmołwić. Tak móhła so potom gmejnska rada hižo 10. nowembra z naležnosću rozestajeć.