Chrósćicy (aha/SN). Před dźesać lětami je sej předsydstwo župy „Michał Hórnik“ do swojeho lětneho dźěłoweho plana zapisało, přewjesć rozmołwu z wjesnymi chronikarjemi a znajerjemi wjesnych stawiznow. Wot toho časa organizuja z nimi kóžde lěto prawidłownu wuměnu nazhonjenjow. Na wčerawše zetkanje w Chróšćanskim Krawčikec hosćencu móžeše městožupanka Zala Cyžowa znowa horstku agilnych zběraćelow historiskich dokumentow witać. Wobšěrnje předstaji na zetkanju Trudla Kuringowa swoje akribiske slědźerske dźěło na temu „Nabožne narodne pomniki we Wotrowskej wosadźe“. Před lětomaj su so w předsydstwje dojednali a rozsudźili, zo přewozmje župa nošerstwo nad projektom. Kaž sej akademija w Freibergu žada, je Kuringowa, a to dwurěčnje, wšitke žadane komponenty, znosyła. Wone sahaja wot wopisanja křižow, modlerskich stołpow a kapałkow přez dokładne wuměrjenje wulkosće a šěrokosće pomnika hač k zapisanym lětoličbam a hrónčkam. Hačrunjež njeje za archiwowanje trjeba podać dokładne stawizniske wopisanje objekta, měješe to awtorka přiwšěm za wažne.